МАКСЫЦЯНТЬ КЕДЕЗЭ А ЧАМИ
Кирий Петя сась ошов кой-кодат тевензэ якавтомо. Муизе эрявикс конторанть, арась чиполас ды кармась учомо. Аштемс савсь талайс, обед ёнов Петянь вачсь пекезэ. Сон ломанесь велень ды ялатеке дошуз, ламос чарькодиця, содась: ошонь ярсамкудосо киськеть ваткасызь, пекесь ялатеке паро ладсо а пешкеди. Секс кудосто сыргамсто сайсь мартонзо сывель, алт, кши, ловсо, куярт.
Петя пшкадсь мельганзо аштиця ломанентень — илизь стувто. Сонсь лиссь ульцяв ды малацекс аштиця кудонть икеле эзементь лангс чамдынзе кудосто саевть ярсамопелензэ. Тантеельгак кудонь коптязь тувонь сывелесь! Салтозь куяртнэнь чинедест пешкедят!
Петя ярсы ды марясы — кие-бути лоткась малазонзо. Варштась, вакссонзо ашти соказь-изазь чама сизя-мизя ломань, оршазь седе беряньстэ а ков, сельмензэ толке кивчкаить Петянь ярсамопелензэ ланга. Ломанесь, теке вачо верьгиз, чама киськезэяк нурьгезь нурьги. Петя эзь цидярдо, тердизе, — адя, келя, леляй, суск, мезе Пазось макссь.
Сизя-мизясь эзь карма учнеме омбоцеде тердемат, озась эзементь омбоце пес ды кармась уцорямо Петянь кшидензэ-салдонзо, весементь нильнесь апак поре. Петя редизе: кедензэ апак шля, кенжэнзэ апак керсе, чинесь эйстэнзэ — теке наксадо капстань парькасто. Кевкстизе:
— Леляй, косо эрят?
Тонась каршонзо таго-мезть мериксэль, ансяк ярсавксто эцезь кургсонзо марявсь мень-бути булдордома. Се шкане малазост мольсь сыре бабине ды сурсонзо тердизе Петянь ве пелев, пшкадсь:
Цёрам, мезекс нулгодьксэнть андат? Мень паросо седееть солавтызе?
Дык, бабай, сон вачодо. Христосось здь мерсь: максыцянть кедезэ илязо чамо. Ванса-ванса, ломанесь пильге лангсто эль пры вачочиденть, тенян, эряви лездамс тензэ, куш андомс...
— Цёрам, неса седееть чевте, ойметь валдо, ансяк эряви содамс, кинень лездат. Те нулгодькс ломанесь, цёрам, нинзэ калмос пачтизе, эйдензэ-какшонзо кудосто старинзе, квартиранзо симизе, ней кудопотмарга бомжови, косояк а роботы. Тензэ эдь ведьгемень иетькак зярс эзть топоде. — Бабинесь стакасто таргизе оймензэ ды увол-авол тусь маласо кудонть пелев.
Петя велявтсь мекев эзементень. Сизя-мизя ломаненть сельмстэ петердсть цёраломанень салавань сельведть, чамаванзо лытась пайстомо эрямодонть сиземань сулей, кедензэ тарность, кода тарны куломадо идезь кисканть рунгозо. Петя таргизе кескавстонзо кадовозь сывель сускомонть, венстизе ломанентень, пшкадсь:
— Саик, леляй, валскенень теть ярсамс маштови.
Эсь пачканзо арсезевсь: «Кие содасы, мекс ломанесь теньс пачкодсь?»
Истямо уш эрзянь ломанень обуцясь — эрьвась тензэ жаль маряви, эрьвантень кедь венсти.
| 
