ВЕСТЬ  ИНЕЧИСТЭ...

Весть Инечинь каршо лелям кевкстни эйсэнь:

—Лёня, якамкасо якавлить? (Истямо кой ульнесь).
Арсян, мень истят кевкстнемат? Ульцява яксеманть пек вечкилия, секс апак арсе меринь тензэ:

—     Нама, якавлинь, ансяк якамкам арасть, зярдояк лангозост эзинь кузне.

Инечинь валске лисинь кудыкелев ды тосто рединь поень кавто ологинеть. Керест ваткавт, эйзэст троке вачкодевть пильгень чалгаминеть. Кода лангозост куземс, эдь сынь сэрейть? Лиссь лелям, ёвтнизе. Келя, кузть кузтематнес, ологинетнень аравтыть моданть лангс, верце пест саить кавалалот ды чалгак лангозост. Сыргак, ансяк иля капша ды келейстэ иля эскеля, лиякс пильге виеть а саты якамкатнень кепсемс.

Васня пелинь, илязан пра якамкатнень лангсто, мейле чалгинь, весть эскельдинь, омбоцеде, ды тевесь тусь: састыне-састыне сыргинь куринканок кувалт. Курок овсе тень тонадовсь лангсост якамось. Якамкатне пек тусть мелезэнь, эдь эйсэст леенек трокскак пильгеть апак начто ютават.

Се чистэнть од ломантне пурнасть верек алт, прякат, лия ярсамопельть, поза. Велепесэ келей кужосонть стявтсть сэрейдеяк-сэрей нурямо, тов кандызь ярсамопелесткак, кирвазсть покш толпандя. Седе покштнень марто пуроминек миньгак, вишкинетне. Ламотне эйстэнек састь якамкасо. Покштне пидесть алпачат, суронь каша, аравтнизь толпандянть перька пиже лугиненть лангс кудосто кадозтненьгак. Минекак, вишкинетнень, каванимизь, сатышкасто утякстнинек нурямосонть. Мейле од цёратне нурясть тейтерест марто. Кавто од тейтерть сайсть мель нурямс кавонест. Од цёратне кузтизь сынст нурямонтень ды утякстызь менельс молемс. Тейтерькатне пижнесть пиже-ожо вайгельсэ, каня кенярдомадонть, каня пелемадонть.

Эзинек фатяяк, кода кармась чопотеме. Од цёратне-тейтертне кадовсть кужосонть толпандянть перька киштеме-морамо. Минь, пакшатне, кие якамкасо, кие истяк, срадынек кудованок.

Вай, косот сеть мазый читне, тиринь койтне?

Маныть велесэ улемстэнь кевкстинь тосонь вейке цёрыне, содасы-арась, мезть истят якамкатне? Тонась чатьмонсь. Васня пакшанть мурниксэлия, мекс беряньстэ келенек содасы. Паро эно, теде икеле сехте од «Эрзянь-рузонь валксонтень» варштынь, кона нолдазь 1993-це иестэ. Тосо «якамот», «якамкат» валтнэяк арасть. Косто эно сынст неень шкань эрзятне марясызь-мусызь?