|
|
Эрюш Вежай. И Н Е В Е Д Ь
И Н Е В Е Д Ь 
Те ульнесь СССР-нть ды США-нть ютковаст «кельме торпингенть» шкатнестэ.
Минь уинек ушмо тевень коряс Модакуншкань иневедьганть. Ков а
варштат, пертьпельгат чивалдонть ало сэняждыця, меремс сэньгевень
тюсонь, ведь ды ведь…Прядома лангсоль эйзюрковось. Минек
иневенчесь-крейсерэсь стамбаро, апак капша, чиремкшни, ве ёндо омбоцев,
ландора толкун пандотнень кутьмерест ланга. Ведьпандотне яла кеверить
ды кеверить каршозонок виев валдодонть мик а неявиця менель
кирьксстэнть-чирестэнть. Течи уема кинек моли Эс-Саллум ведьулонть
куншкава. Чи пеле, ювт мери, лымбиця, шожда-лембе сувнэнть пачка,
эль-эль неяви човине, сувнэванть меньчевиця чопода кикске, Африка
модамасторонть чирезэ. Керш ёно модась – Египет, вить ёнов венстявсь
Ливия Масторось. Тосто, мода кикскенть ёндо, вельксканок секе тев
венстявкшныть-таргавкшныть Пелеве ёнов ливтиця нармунь велеть. Сынь
ливтить иневеденть велькска чачома масторов. Сырнесэ валозь, манейде
маней менельстэнть, секе тев кайсевить цянавонь, яксяргонь, письмаронь,
локсеень, идем дигань-галань, каргонь, сёнксень ды лия эрьва кодамо
покш ды вишка нармунень сееремат, цикнемат, крякномат, клокномат,
вешкевст ды лият, оймень талновтыцят вайгельть-гайтть. Нама, седе ламо,
вень шкане. Ялатеке, читькак неть гайттне-вайгельтне марсевить малав
апак лотксе, чинек-венек токшить-талновтыть седеенек, конат, сынст
марямсто, мик киторк мерить-теить… Иневенчень
матростнэ-офицертнэ, прянь кепедезь, сеедьстэ ильтнить верьга ливтиця
нармунтнень эсь вановтсост. Нармунтнеде истя ламо эрси, мик
маряви-неяви тенек, теке эрьва пачинесь, кона машты ливтнеме, сыргась
Пелеве ёнов, Чачома масторов. Истямо шкане мезде арси ломанесь? Эрьвась эсенседензэ.
Монгак ванан неть нармунень велетнень-рисьметнень мельга ды арсян: -
Весеменень- арась, печтяви те покшстояк покш пирявксось, келей-келей
иневедесь? Кодамо вий ды мень ине бажамо терди нармунтнень истямо
васолксов? Венельксэсь сэтьме, вадря. Ансяк, иневедесь, сон свал,
кода кортнить эзганзо укшныцяте, свал кадови ИНЕ ВЕДЕКС… Корозо аволь
шожда… Сондензэ пачк эряви лецтнемс мелензэ-коронзо парсте ванозь… |
| Категория: Мои статьи | Добавил: tati (06.01.2010)
|
| Просмотров: 1088
| Рейтинг: 0.0/0 |
|
|
|
