Телень само

Салавинька, мода ланга усковозь, менель ёжова ливтязь, сась тедедень телесь. Алкукскак, чить лембель-пароль, чокшне аламодо экшендсь, веть ушонть сыре якшамо куродызе. Валске марто чувттнэ, куракштнэ, лей чиресэ сандейтне, сэрей тикшетне вельтявсть цивтёрдыця лекшсэ. Пшти, кельме салмукстнэнь ланга, юткова стамбарнэ нолажтсть пикстерькаень ёртниця чипаень налтнэ. Пертьпельксэсь аштесь каштмолезь ды прок канкстомозь.

Курок пувазевсь вармине ды весемесь лыказевсь-сорнозевсь. Чаразь-велязь певерсь лекшесь, седее бойкасто уезевсть менельга пельтне. Секскак сэнь верьксэсь нацяс копачавсь кавшаня, рудазов сёрмавсо.

Теде мейле вармась оймась ды певерезевсь лов. Сон атякш пряшкаль, тустоль, прась видьстэ, мерят кияк вере пельтнень пельксэнь-пелькс явшесь ды капшазь ёртнесь алов. Лымбиця,  пупкставксов те ашо шаршавось новолезь аштесь талайс, мейле качамокс срадсь.

Тень кисэ масторксось полавтызе чачонзо: весемесь чикордомас ванськадсь, сокоргавтомас валдомгадсь. Сёксь пень раужо ды чопода лия тюстнэ тунь ёмасть, ацавсть ванькс, пухляня, сыреждиця вельтявкссо. Ансяк редявсь: модась истямо лембе полононтень кенярдсь. Ней тензэ сехте кежей якшамоськак аволь тандавкс. Бульчом, тандалемскак а мезть – шкань киресь свал истяня кевери. Ней сась теленть шказо, течи – сон азорось.