Варда

(Ёвтнема)

… Ногайтне каявсть апак учо. Веть, ковонь валдосо. Алашатне мезе вийть чавсть модасонть. Лангсост озыцятне марявсть идемевсень кучовксокс. Покш шапкатнень алдо сельместкак эзть неяво. Кедьсэст кирвазтезь палмантне сэвсть весементь, мезесь понгсь кист икеле.….

… Азрава сыргозсь тейтерьавань амазый сееремадонть. Сэрезэ соракадсь: «Ногайтне». Авась ледстизе, кода вишка пингстэ сельмензэ икеле ногайтне  кавтов лазызь тетянзо, аванзо марто эль кенерсть кекшеме…

Сеерематне виевгадсть. Марявсь лишмень цяхамо, цёрань асодавикс вайгельть. Акшай умок стясь, капшазь оршнесь. Азрава эзь сода мезть тейнемс. Вересь потсонзо лакась. Сон чийсь лавсенть ваксс, тосо тантейстэ удось ниле иесэ тейтерезэ.

Ушосонть те шкане модась човоргадсь менеленть марто.

– Акшай, тон ков? – кенерсь кевкстеме низэ.

Мирдесь варштась лангозонзо. Сельмстэнзэ неявсь куломась. Акшай чатомонезь пекстызе мельганзо кенкшкенть. Авась  автордызе лавсестэнть Татюшонь. Эйкакшось авардсь, сонгак нать маризе апаронь самонть. Лисемс ушов, пели, кие соды – мезе тосо учи эйсэнзэ. Кудосо лияды – ногайтне пултасызь, кирвазят теске. Те шкане Азрава маризе олгонь пултамонь чиненть. Седе тов авась эзь арсе. Сон куроксто певердсь кудостонть…

… Лишметнень лангсо ногайтнеде, мерят, пе арасель. Вайгельтне,  толось, качамось, ломантне  – весе човорятовсь Азравань прясо. Чувтонь кудынетне шождасто макссть пряст толонь виентень. Коштось пешкедсь верде ды куломадо. Азрава талакадсь, сон неинзе ансяк сыре ногаень ёжов сельмтнень. Соракадсь. Пилес каятотсь ракшань сеерема. Сон каявсь тозонь. Кинзэ пиризь палыця лаз петне, конатне прок верде прасть, эзть мере ютамс седе тов. Авась снартнесь  ваксканзо чиемс – тосо ногатйтне. Нетядызь – салатадызь. А идеви ракшась. Косо Татюш? Косо тейтерезэ?

– Татюш! Татюш! – вайгелезэ маштсь, виензэяк маштсть.

Азрава мезеяк эзь маря,  эзь нее. Модась пильгензэ алдо тусь ков-бути васов-васов…Прясо аштесь Татюш:

– Татюш! Татюш!!!

Ансяк тол, лажнома…

Авась эзь чарькоде, кода пачкодсь виренть малав:

– Татюш! Татюш!!!

Азрава пачкодсь пултазь палманенть ваксс:

 – Ёвтыка, тон эзик нее Татюшонь? Сон вишкине, мазыйне.

Мезеяк эзь маря палманетнь эйстэ. Пачкодсь покш кевенть вакс:

 – Эзик нее монь тейтерем? Сон вейкине. Косо?

«Азра-ва-а а-а», – марясь удалдонзо гайгема. Велявтсь. Арась – те аволь тейтерезэ. Те ульнесь Тундайка.

– Тон эзик нее Татюшонь? – кевкстсь Азрава.

– Эзия, нать полонс саизь. Моньгак арась, – Тундайка лайшезевсь. – Мезе ней карматано тееме?

– Тон эзик нее Татюшонь? – омбоцеде кевкстсь Азрава.

Тундайка ансяк ней редизе аванть сельмстэ  тандадоманть ды а чарькодеманть.

– Татюш вишкине, вейкине монь. Косо сон? – Азрава ёмсиця ломанькс яксесь пултазенть юткова, ахолясь кедьсэнзэ.

 Тундайка чарькодсь – авась превстэ лиссь. Азрава те шкане яксесь виренть чирькева. Сон эзь чарькоде, косто вешнемс тейтерензэ:

– Татюш! Татюш!

А куш-а каш, аванть икеле ульнесть чувтт, сэрей тикше. Сон эзизе редяяк, кода виресь кармась чополгадомо, чувтнэ сэрейгадомо, чись ёматомо. Сон  яла мольсь ды мольсь… Лопатне чувтотнесэ раужкадсть, лоткасть морамо нармунть… Чопода ды каштмолема… Чись ёматотсь… Косо-бути аволь васоло марязевсь лакштордома, прок коське тарадт кие-бути синтри. Аванть седеезэ кирмицявсь. Пелезевсь. Косо сон? Ков сась?

Аламос аштезь марявсь шошнома… Апак учо ракамо… Азравань пилес пувазевсь экше варма. Косто саевсь вармась сэрей чувтнэнь ютксто?

Авась мольсь икелев. Мольсь те шкамс, зярс лоткась неявомо модась алдонзо ды ёматотсть чувтнэ. Икелензэ аштесь… тейтерька. Рунгозо раужо, сонсь кепе,  нурька  панарсо, черензэ эрьва-ёнов вармась лыкштяи. Сельмензэ цивтёрдозевсть а мазыйстэ. Раужосто. Ваны аванть лангс а вадрясто, прок пейди. Истя аламос аштесь ды велявтсь. Кутьмерьсэнзэ Азрава нейсь… раужо  тешкс.  Авась сеске сась ёжозонзо. Чарькодсь кие икелензэ ашти:

– Варда, – эль марявиксстэ тошказевсть турватне.

Чопачась  велявтсь  ёнонзо. Раужосто пейдезевсь, цяхазевсь. Азрава ледстизе, кода сон ванстась Татюшонь Вардадо. Кавалалонзо колмоксть сельгенесь. Мернесь: «бути нейсак тейтерьканть, конань кутьмерьсэ ашти тешкс   – чийть мезе вийть. Те чопача. Апаро ойме». Зяро а мазый кортамот марясь авась Вардадо. Кортыть, келя, оймесь  салси эйкакшт. Секскак ламот пельсть эйстэнзэ ды кекшнесть эйдест.

Ней жо  сонсь Азрава аштесь Вардань икеле. Авантень ялатеке, мезекс эрямс тензэ Татюштомо?

– А пелят эйстэнь? – кевкстсь Варда.

Азрава чувтомсь. Эзь арсеяк чопачась карми мартонзо кортамо:

– Монень ялатеке. Тейтерем ёмась.

– Татюш?

– Татюш, – Азравань сельмстэ неявсь кемемань толнэ. Паряк Варда мезеяк соды эйстэнзэ. – Тон эзик нее сонзэ?

– Кода эйкакшонк эйстэнь ванстатадо, ней тонсь кевкстнят эйсэнь.

Неть валтнэнь марто пувазевсь кежей варма.

– А содан косо тейтереть. Содавлиньгак, аволинь ёвта. Эстень саевлия.

Ды таго цяхазевсь. Весе виресь лажнозевсь. Мейле сельгсь ды тусь эсензэ киява. Кадызе Азравань ськамонзо. Сон кувать вансь Вардань тешксэнзэ лангс. Эрявсь мезеяк теемс. Ськамонзо авась тестэ а лисеви. Авантень ледстявсь ногаень сельмтне шапканть алдо, ракшань сееремась, мирденть меельце варштавксось, тол потсо кудост… Татюш…

 – Варда-а-а-а-а!!! – серьгедсь Азрава. – Аштек, иля туе! Тейтерькась эзь лотка, раужо тешксэсь кармась ёматомо.

– Варда-а-а-а-а!!! – аванть вайгелезэ срадсь весе виренть келес.

 «Варда, Варда, Варда», – кайсесь коштось Азравань сеереманзо.

Чопачась эзь велявто.

– Варда, тонь икеле  кияк стякшность кумажа лангс? – серьгедсь авась. Эзь арсеяк, тейтерькась марясы.

Сон маризе.

Маризе ды велявтсь.

− Мондень ансяк пелить ды сюдыть эйсэнь, – чувтнэнь ютксто марявсь Вардань вайгелесь. – Кумажа лангс кияк эзь пракшно.

– Вант, Варда, пульзинь икелеть. Пульзинь ды энялдан. Лездак тень. Бути ули эйсэть парочи – лездак муемс тень Татюшонь. Бути жо тон алкукскак истямо кежеят ды чоподат, тейть мартом  – мезе мелеть ули. Эйкакштомо ялатеке а эрямо.

Азрава прась масторов. Сельведтне копачизь весементь. Зярс авардсь – сонськак а ледсти. Лугаськак  икелензэ шлявсь сельведтнесэ… Апак учо марвсь пилезэнзэ тошкамо: «Стяк, Азрава. Стяк ды мольть се яннэванть, зярс виресь а прядови». Авась кепедизе прянзо. Кияк. Ансяк кинь-бути  лексемазо маряви.

«Зярдо лисят вирьстэнть, несак Татюшонь. Сон колмо покш кевтнень удало кекшсь».

– Варда, – тошказевсь  Азрава. – Те тон?

– Мон…

– Мекс кекшнят эйстэнь?

– Раужо  тешксэсь кутьмерьсэнь а мери. Сон кармавты тееме беряненть. Тонеть ансяк паро теян.

– Сюкпря теть, Варда, сюкпря теть, – марямга мерсь авась.

– Мольть икелев ды мездеяк иля арсе. Иля пеле, а манятан. Валом кирдян.

Авась напустясь яннэванть. Мейле апак учо мекев велявтсь:

– Варда, мерить ансяк монень паро теят. Мекс тень лездат?

Ансяк чатьмонема. Лексема маряви.

– Тон васенцекс пульзить икелень. Азё чийть. Шкат а пек ламо.

Азрава чийсь. Модантькак алонзо эзизе маря. Чийсь ды пельсь а кенеремс. Чийсь ды пельсь удалов варштамс. Виресь кодаяк а прядови, яннэсь вети икелев.. Аванть вийтне маштома лангсот… Кодаяк Татюшонь муемс… Ансяк лисемс… Окойники, виресь прядовсь. Азравань икеле сравтовсь певтеме пакся. Косо Татюш? Косо сон?

 – Манимим Варда, манимим. Татю-ю-ю-юш!!!

Сэрей кевтнень удалдо неявсь эйкакшонь пря.

– Авай!

– Татюш! Эйдинем! – Азравань мештьсэ ойме чачсь. Сон кутмордызе тейтерензэ ды кодаяк эзизе нолда.

– Сюкпря теть, Варда, сюкпря, – секе тев тошкасть сонзэ турватне.