ФРОНТОВ СЁРМА

Войнань шкань телетне ульнесть якшамодояк якшамот ды лововт. Мольсь 1944 иень кувака телесь. Тонавтнинь мон сестэ омбоце классо ды, кода весе минек школань пакшатне, снартнинь сёрмань сёрмалеме. Сёрмат кучнилинь тетянень, покштянень ды братон туртов. Сынь весе тюрсть немецтнень каршо. Мон эсень сёрматнесэ ёвтнинь, кода тонавтнян, кода лездан аванень ды бабанень кудоютконь тевтнесэ. Пеняцякшныньгак авань ды бабань лангс, мекс сынь а нолдтнить монь эйсэ Якстере пандо пряв кирякстнеме. Сынь вейкетьстэ мерильть:

- Ва курок войнась прядови, сыть покштят ды тетят, кодыть тонеть карть, сестэ молят кирякстнеме.

— Тейтя паро тев, черькстака сёрмине покштятень,— мериль бабам ды ушодылизе, мезде эряви сёрмадомс, мезде лецтямскак а эряви.

Весть мон теинь ильведькс, сёрмадынь пенгень а сатомадонть ды ёвтынь, кодамо якшамо минек кудось. Бабам кунсолызе, мезде мон сёрмадан ды мерсь:

—      Нейке сезник сёрмат! Иляк кучо! Кады
покштят а соды минек якшамо кудодонть. Алтась
бригадирэсь сы недлянть максомо лишме. Ней зярс
олгсо уштнетяно, паряк, а кельметяно.

Зярдо бабам оймась, мон сонзэ кевкстия:

—      Бабай, сёпомась — те кенгелема, кода арсят?
Бабам варштась сельмезэнь ды мекс-бути седеяк нусмакадсь,   ловтаня   чаминезэ   сормсевсь   ды томсь.

—      Кода теть меремс, цёрам?.. Те, нама, кенгелема. Ды эряви содамс, мекс аволь кенгелемаяк. Покштят, левкскем, пек ризныця ломань, сонензэ пеняцямс а эряви. Мейс ёвтнят сонензэ: те арась, тона арась? Сёрмадт, минек весемесь ули, сестэ покштят ды тетят курок сыть, кода изницят. Чарькодить ней, мекс сёпомась — аволь свал кенгелема?

-        Монь койсэ, свал эряви эрямс апак сёпо.

Бабам кувать ёвтни,  мекс эряви стакачинть ды кшивтеме эрямонть сёпомс. Мон ванан бабань чамас а липниця сельмсэ, сон неи, монень а чарькодеви лия видечись.

-        Вант, цёрынем, тонсь ды арсек,— покштятень эряви изнямс ятось ды самс кудов. Минь тонь марто сонензэ кучтано сёрма, косо весемесь якшамо, стака, нусманя.   Истямо   сёрманть  ловномсто   покштяткак
нусмакады,  кедензэ новолить, ды карми беряньстэ тюреме.

Бабам вадяши чупонь-чапонь наразь прям, истя сон невти мельспаронзо. Сон неи, мон окойники чарькодинь сонзэ валонзо.

Кандыловось валясь апак уштне кудынетнень, косо, теке озякинеть, чоледсть пакшат ды тарность сыре ломанть. Авам теленьберть важодсь тинге лангсо — пивсэсь. Чопотетсь. Минь учотано, зярдо сы аванок. Маряви, кие-бути вачкодизе кенкшень циндеренть.

— Авам сась! Авам сась! — ниле вайгельсэ пижнетяно.  Мон кепе чиян кудыкелев ды чоподасонть кевкстнян:

— Кие сась?

— Панжт, цёрынем! — макссь вайгель авам.

Кенкшесь   цийнезь   панжови.   Шержей,   якшамо коштонть марто, теке лекшсэ копачазь килей, совась авам.  Бабань марто лездатано аванень. Шубань повтне беряньстэ юксевить. Авань ливезев шубастонть моли сюронь ды кодамо-бути цецянь чине.

-        Наталь,   кельмить?  Кедеть  пек  якстереть ды
турват сэньшкадсть,— бабам кевкстни, талны, нурькине эскелькссэ яки урьванзо перька.

Авам чаравтсь прясонзо ды тошказь мерсь:

-        Авай,  иля пеле,  эзинь кельме,  сизинь  мекс-бути течи, ченги потмом. Макет, авай, ведь.

Бабам тупор-тапор ношкстась каштом икелев, ды монгак сонзэ мельга кирнявтынь аванень ведень кандомо. Пупординек бабань марто кияксонть куншкас кадозь тенстенть трокс ютамсто. Бабам прась ды кода маштсь чумондсь монь эйсэ:

— Овто левкс, кольстик пильгем! Тенстенть козонь понгсь кадсак! Вай, а стяван!

— Авай,    иля   кежиявтне,    нуцькинеть   тондеть икеле прась — тон сонзэ трокс ютамсто пупордить,— авам оймавтсь ававтонзо.

Бабам ёзась пильгензэ ды кежтеме музгордсь:

— Овто левкскеть кисэ пандокс стят. Авать пильгезэ цють эзь сиве, ялатеке а талнат.

— Авай, иля ацирьгале, простямизь. Минь нейке кусттядызь каштом лангс,— ладсесь бабань авам.

Бабам курок оймась ды пшкадсь:

—      Озак,  Наталь,  ярсамо.  Мон а кирдян кувать кеж, атят-сэрдят саевлидизь.

Авам ярсась састо ды вансь ваканонтень а неиця вановтсо. Марявсь, кода авань кедьсэ пенчесь сорнозь вачкоевсь ваканонтень. Авам аштесь столенть экшсэ видьстэ, сон зярдояк ярсамсто эзь капша.

Продолжение