ЭРЗИАНА эрзянский литературный сайт

ПРЯКСЛОПА
Категории раздела
Мои статьи [331]
Стихи [571]
КАВТО ВАЛСО
Статистика
Главная » Статьи » Мои статьи

Тимохина Татьяна Дементьевна. ЛИЗАНЬ ТЕШТЕЗЭ (Продолжение 1)
ЛИЗАНЬ ТЕШТЕЗЭ
(Продолжение 1)

см. Начало

Пластов А.А. Первый снег, 1946


Зярдо  прядовсть весе  уроктне,  тонавтницятне,  партатнесэ калдордозь, кармасть пурнамо кудов. Ушосо Коля нусманясто пшкадсь:

Мон содан, мекс Поля течи эзь сакшно школав: сонзэ тетязо чавовсь фронтсо, конёв тенст сась. Истя авардить кудосонть!

Овсе аволь теде эзь сакшно. Сонзэ кемензэ каладсть, — каясь вал Нюра.

А монь тетям курок сёрма кучи. Мои эрьва субутасто кортнекшнян мартонзо, — поладсь Лиза.

Весе варштасть сельмеде сельмс. Зина кевкстизе:

     Косто некшнесак тетять?

Лиза чатьмонсь. Сон тарадкесэ цёхаесь пухляня ловонть, кона ансяк прась. Кудов молемась ульнесь пек паро. Велесэнть кар­масть уштомо кудотнень. Трубатне, прок паро ялгат, ве шкасто кирвазтнизь цилимест. Ловось чикордсь пильгало, теке парсте костязь крахмал.

Минек авам уш модамарть пиди, — таго мерсь Лиза ды нолштынзе турванзо.

Модамартнень дезертир тетятень, да? — апак учо кортазевсь Коля, ды Лизань кежей варштавкстонть туевсь ве ёнов. — Тон ведь тонсь мерить, «эрьва субутасто кортнекшнян мартонзо», — кода-бути кокнозевсь цёрынесь.

Чатьмонть, чаво чалгамо, а то лов потсо кармат улеме! — кежиявтсь Лиза ды кепедизе илевнензэ.

Коля лепштизе прязонзо шапканть, конань Лиза а весть нельгенизе ды ёртнизе латопряв, ды тусь чиезь. Мельганзо ло­вонть лангсо кикстнэ мадсть кубикекс. Ведь карнетне пильгсэнзэ однэть. Лиза стясь крыльця лангс, кедьлапушканзо ладинзе тур­ванзо малас ды серьгедсь Колянень:

     Коля-а-а! Кие кодынзе карнеть?!

Коля сеске лотказевсь, кепедизе вейке пильгензэ ды пижакадсь:

Вася-а деда-ам! Лизушка-а, адя чокшне Раторов ледянкасо
кирякстнеме!

Монень аютко-о! — серьгедсь тейтерькась ды арсезевсь: «Кода чуднойстэ сон монень мери — Лизушка... Ну, кадык... А мон сонензэ карман мереме — Колябай».

Некеть арсематнень марто Лиза совась кудос. Понгавтызе чувтонь тулос сумканзо. Сон пек вечки, зярдо кудонь кияксось ваньксстэ шлязь, голландкась палы, толось оштё апак пува. Истямо шкасто голландкасо толонь сулеесь нолси кенкшкундамонть.

     Авай, а мезе, бути ней панжоволь кенкшесь ды соваволь тетям? Мельганзо капшазь пекставлизе кенкшенть ды меревель: «Ну, якшамо! Веть кабу Бурёнкась аволь вазыя, вазось кельми, ломанде визькс карми улеме». Веть мон бу сыргозевлинь, а тетям совавтоволь кардазсто тештев коня вазнэ. Мои бу Мазыйка лем тензэ путовлинь. А мейле каявлинь ведрас ловсо ды максовлинь сурон вазонтень. Вай, кода сон чуднойстэ кармаволь потямо!

Авазо чатьмонезь невтсь стольпесэ сёрманть лангс ды мерсь:

Саты лавгамс, ловныка оно, тетят кучизе.

Авай, тон а маштат ловномо, косто эно содат — сёрмась тетянь?

Варштык сёрмань уголнэнть, тосо кузнэ рисовазь. Минь туемстэнзэ истя кортакшнынек: бути ули рисовазь кузнэ, сестэ те сонзэ.

Лиза ловнызе сёрманть ды киштезь яказевсь аванзо перька.

Авай, авушкай, неят, тетям мезть сёрмады? Маштнесынек, келя, фашисттнэнь ды кудов сатано. А оштё сёрмады вана мезе, кунсолок: «Валинк умаринань корёнтнэнь, а то кельмить». Минь сонтемензэяк чарькодинек тенень, да, авай? Ванды оштё ташто шальсэ нетьксэст сюлмсесынь, седе лембе карми тенст улеме.

Тон монень иля ёвтне сёрмадонть. Тон марямга ловнык сонзэ.

Зярс Лиза педе-пев ловнось сёрманть, авазо аштесь эземпесэ ды салавине нардтнесь чамаванзо чудиця сельведтнень. Лиза фатясь тенень, кутмордызе ды палызе аванзо. Мейле таргинзе те­тянзо весе серматнень, конат сюлмазельть пацясюлмос, ды кортазевсь:

     Вейкентеньгак тетям эзь стувто кузнэ рисовамс. Кода васолдо сынь сыть! Мусызь ведь минек кудонть. Авай, эрьва сёрманть тетям кедьсэнзэ штюпсесы.

Лиза кувать палсесь тетянзо серматнень, авазо велявтсь вальманть ёнов ды таго нардтнесь якстерьгадозь сельмензэ икельга пацясонзо.

...Велесь яла эрясь эсензэ эрямосо: кинень сась фронтсто стака куля, кинь арасельть уштомс пенгензэ, кинь оштё мезеяк лия. Лизань авазояк пиштевтсь пенгень коряс. Сонстензэ ульнесь аютко, чинек-венек роботась колхозсо. Секскак Лизань патязо Поля течи валске марто нурдынесэ тусь вирев. Ней шказо уш обедтэ мейле. Поля жо яла эзь са вирьстэ. Те пек ацирьгавтызе Лизань ды аванзо. Секс ламонь апак корта Лиза кармась сыргамо патянзо вастомо.

     Иля яка, курок чопоти, оштё тандадат мездеяк. Аштек Аркаша марто, монсь молян каршонзо.

Те шкастонть ушосто совась Аркаша. Сон озась кухнянь вальмалангс ды кармась ловсонь вешеме.

Ловсось арась. Бурёнка эзь вазыя, — мерсь авазо.

Сестэ эно велькс дай.

А вельксэсь ловсовтомо косто?

Косто, косто... Бурёнкань жо ули одарозо, азе потявтык, — яла нернесь цёрынесь.

     Авай, зярдо ней те дурацькесь превеи? — машнетезь мерсь Лиза ды лиссь кудостонть.

Продолжение 2
Категория: Мои статьи | Добавил: tati (07.01.2011)
Просмотров: 310 | Рейтинг: 0.0/0 |
Всего комментариев: 0
Имя *:
Email *:
Код *:
...ERZINFORM
ОД СЁРМАДКСТ
[31.10.2010][Стихи]
Александр Арапов. З... (0)
[21.10.2010][Стихи]
Исланкин Юрий Иванов... (0)
[21.10.2010][Стихи]
Исланкин Юрий Иванов... (0)
[21.10.2010][Мои статьи]
Исланкин Юрий Иванов... (0)
[01.02.2010][Мои статьи]
Александр Маркович Д... (0)
ВЕШНЕК
ЛОПАНТЬ ЯЛГАНЗО
  • Официальный блог
  • Сообщество uCoz
  • FAQ по системе
  • Инструкции для uCoz

  • Copyright MyCorp © 2017
    Сделать бесплатный сайт с uCoz