ЭРЗИАНА эрзянский литературный сайт

ПРЯКСЛОПА
Категории раздела
Мои статьи [336]
Стихи [571]
КАВТО ВАЛСО
Статистика
Главная » Статьи » Мои статьи

Тимохина Татьяна Дементьевна. ЛИЗАНЬ ТЕШТЕЗЭ

Ёвтнема

ЛИЗАНЬ ТЕШТЕЗЭ

Сундерьгадсь. Лиза ашти озадо вальмало ды ваны пандопрясо школанть лангс. Друк сон велявтызе прянзо тетянзо ёнов ды кевкстизе:

     Тетяй, тон содат ёвкст?

Тетязо те шкастонть ловнось эчке книга. Лизань кевкстемась лоткавтызе сонзэ ловномодо.

Содан, — мерсь тетясь ды варштась тейтерьканзо лангс.

Сестэ ёвтнек сехте мазый, ансяк аволь яга-бабадо: «Эрясь-
аштесь вирьсэ яга-баба. Тусь сон човалянь кочксеме...». Тень мон уш содаса.

         Аволь истямо. Мон овсе лия ёвтнян. Кунсолок.
Эрясь-аштесь пандопрясо церькова. Сон каштансто ваннось каладышка кудотнень лангс, конат прок сюконякшность икелензэ. Неть кудотнень сельмест сокоргалесть мушконь пульденть, пилест лоткасть марямодо пряхань увномадонть. Налкстась народось берянь эрямодонть ды синдизе церьковань каштан прянть, попонть кшувавтызе. Пряхатнень уштызь, пуленть нардтнизь. Ней те церькованть юртсо ашти покш школа, вальманзо келейть. Каладо кудотнень таркас эрицятне стявтсть од кудот. Неть кудот­нень вальмаланга цветязевсть розат. Пиретнева пижелгадсть умарьчувттнэ. Весемесь полавтовсь. Ансяк модась, чись ды коштось кадовсть истят жо.

     Тетяй, те аволь ёвкс. Те — минек школадонть ёвтнема. Тон ёвкс монень ёвтнек.

Курок ёвкстнэяк ёвтневсть, ды весь нежедсь вальматнес. Ансяк кудосонть кияк эзь удо. Лизань тетязо, кровать лангсо мадезь, тарги папироскадо. Удалце кудосо вишкине столь лангсо палы лампа. Абажурозо конёвонь, пелевидьс чентязь. Лиза ашти те лампанть икеле, кедьсэнзэ ручка, икелензэ конёв. Сон ваны чоподантень, косо, прок тештине, цитни тетянзо папироскась.

Тетяй, кода сёрмат ушолить, а?

Кинень сёрмадовлить?

Нама, сёрмадомскак а кинень. Кадык буто тон Московсат, ды мон теть алкуксонь сёрма сёрмадан.

Ну, улезэ истя, ушодт: «Шумбрачи, тетяй. Минь получинек пельдеть сёрма. Покш пасиба кисэнзэ...».

А мейле кода?

Мейле од кулят кодаткак.

Ну, мертяно, каськасо крысась варязонзо пондо морковт кандтнесь. Саламонть кис крысанть минь тарадкесэ паринек. Истя?

Те вишкине. Теде а эряви.

Мезесь вишкине, варясь? Оштё кодашка!

Кулясь вишкине. Мезе-бути лия, седе покш эряви сёрмадомс.

Ну, сестэ седе, кода Васямезень вазось катканть пулонзо лангс чалгакшнось. Вай, мезе тосо ульнесь!

Тетязо пейдезевсь ды ёвтнизе, кода эряви сёрмадомс. Зярдо сёрмась прядозель, мерсь:

     Сехте алов сёрмадык чинть ды иенть.

Лиза покш буквасо сёрмадсь: «1941-це ие. Июнень 21-це чи».

Омбоце чистэнть ушодовсь войнась, ды велестэнть цёратне сеске кармасть солазь соламо.

Лизань тетянзо войнав саизь теленть ушодовомсто. Туемстэ сон мерсь нинстэнь: «Иля аварде, Наста, сёрмань сёрмадыцят ней ули. Мон курок кудов сан».

Лиза тетянзо туемстэ овсе эзь аварде. Мекевланг, мик кенярдсь сень коряс, мекс ней карми тетянстэнь алкуксонь сёрмань сёрмалеме. Сон палызе тетянзо ды мерсь тензэ салавине: «Самсто рамак монень сурсеме ды сырнень эрьгть».

Ансяк Аркаша, конань иензэяк ульнесть ансяк вете, пек авардсь тетянзо кис ды авардемань пачк кортась:

     Кие ней монень карми конёвонь самолётонь тейнеме? Ведь авамгак, Лизаяк а маштыть! А олгонь солдатонть кие киштевтьсы? И-и-и!..

Тетязо вадяшизе Аркашань прянзо, нардынзе сельведензэ, озавтызе кумажанзо лангс ды кортась:

Иля аварде, цёрынем. Мон самстон туян теть алкуксонь самолёт.

Теште марто? — пейдезевсть Аркашань начко сельмензэ. — Зярдо тон сат, тетяй?

Вана тундось ансяк сы, монгак велявтан кудов.

Тетяй, оршик шубат, а то самолётонь кандомсто кельмат.

Мон тоско ставтан эстень шуба.

Мезень? — кевкстни Аркаша, мик стувтызе авардеманзояк.

     Пандопрясто кундан баран, сонзэ кеденть эйстэ шуба ставтан.

     А баранось мейсэ карми якамо? — яла эзь кадно тетянзо цёрынесь.

Те кевкстеманть лангс тетясь каршо вал эзь муе. Весе лиссть ильтемензэ, ансяк Аркаша озась вальмалангс ды кармась учомо теште марто алкуксонь самолёт. Учнекшнесь сон эрьва чистэ.

Вана мольсь уш январь ковось, ансяк Аркашканень эзь учово самолётоськак, тетязояк. Ды ней цёрынесь уш вальмаваяк эзь ванно. Телесь ульнесь пек якшамо, вальматне свал эрсесть кельмевкст.

Течи школавгак тонавтницятнеде састь овсе аламо. Школань вальматне кельмезь. Кавто партат шаштозь голландканть ваксс. Сон цють лембине. Эрьва партанть экшсэ аштить нилень-нилень тонавтницят.

Анна Ивановна учительницась яки классканть ды толкови задача. Кемензэ прясо ловнесь ашти прок вата пакшке. Сон эзь арсеяк соламо. Учительницась шкань-шкань ёзы тонавтницятнень якстере сурнэст, эжди эйсэст ойме коштсонзо.

Чикордозь панжовсь кенкшесь, ды классонтень совась Лиза. Кемнензэ кокность прок эень.

Ну, кандыть? — кевкстизе Анна Ивановна Лизань.

Кандынь, — ансяк кенерсь мереме тейтерькась ды кельмевкс кемтнесэ нолажтсь кияксонть лангсо. Покш ведьме марто сэнь коцтонь сумкась ливтясь классонть куншкас.

Вай, кода пильгень кельместь, — каявсь Лизань сорныця вайгелезэ.

Тонгить пильгеть голландка кургонтень, — мерсь учитель­ницась ды путызе эсь табуретканзо голландканть икелев. Мейле сон кепедизе Лизань сумканзо ды кармась тосто таргсеме тюжалгадозь ташто книгатнень.

Косто саить? — кевкстизе Анна Ивановна.

     Минсенек кудопотмарсто,  — сурнэнзэ лангс пувсезь, мерсь Лиза.

Курок эжницянть чамаумарензэ якстерьгадсть, шаленть алдо лиссть, прок лияназонь, ашо черензэ. Мизолдозевсть сэнь сельмензэ, ды сон кортазевсь:

Анна Ивановна, мон моро содан.

Переменасто ёвтасак, ней анокстадо диктантонь сёрмадомо, — ды кармась  явшеме тонавтницятненень тюжалгадозь кни­гатнень.

Неть кармить улеме тетрадканк. Сёрмадодо книгань строчкатнень юткова, букватне седе парсте кармить неявомо, — толковась Анна Ивановна.

Ниленеть аштезь, а ён карми улеме сёрмадомс, — мерсь Нюра.

Сень кис лембе, — каясь вал Коля.

Ялатеке савсь ойсемс башка-башка. Курок уш весе сёрмадсть диктант, ансяк марявсь, кода тонавтницятне носксть судосост ды чикордсть ператне.

Курок чернилатне кельместь, ды учительницась мерсь:

     Оштё вейке ловномань урок, ды тутадо.

Продолжение1

Категория: Мои статьи | Добавил: tati (07.01.2011)
Просмотров: 1439 | Рейтинг: 0.0/0 |
Всего комментариев: 0
Имя *:
Email *:
Код *:
...ERZINFORM
ОД СЁРМАДКСТ
[19.01.2010][Стихи]
Александр Арапов. С... (1)
[21.10.2010][Стихи]
Исланкин Юрий Иванов... (0)
[24.01.2010][Мои статьи]
Регина БУДАРИНА. Пут... (0)
[24.01.2010][Мои статьи]
Художники в СССР. Из... (0)
[21.10.2010][Стихи]
Исланкин Юрий Иванов... (0)
ВЕШНЕК
ЛОПАНТЬ ЯЛГАНЗО
  • Официальный блог
  • Сообщество uCoz
  • FAQ по системе
  • Инструкции для uCoz

  • Copyright MyCorp © 2024
    Сделать бесплатный сайт с uCoz