ЭРЗИАНА эрзянский литературный сайт

ПРЯКСЛОПА
Категории раздела
Мои статьи [336]
Стихи [571]
КАВТО ВАЛСО
Статистика
Главная » Статьи » Мои статьи

Тамара Сергеевна Баргова. Кувака ды лужаня эрзянь морось

Кувака ды лужаня эрзянь морось

 

— Лиза патяй, ёвтнека, кодат морот ялгацек моратадо?

— Минек, тейтерем, седе ламо моронок стариннойть, лужанят… «Мадинь, удынь, вай, тирякай…», «Пуви варма…» Моратано колмонек, мон, Настя Кальмагаева ды Аня Кальмагаева. Лияткак бу савольть юткозонок  ды минь уш тонадынек колмонек, вайгеленек парсте ладясть, лиятне бокав таргить…
Вана истя эрямосонтькак, кие-бути марто китне-янтнэ ладить, кинь-бути марто трокс молить.

Начаркина Елизавета Павловна 70-це ие эри моданть лангсо, вете эйкакшт кепедсь-стявтсь пильге лангс. Весе ней уш таркаваст, вейке церазо ансяк кадовсь апак урьваксто. Браттнэнь свадьбатне мольсть пецек-пецек, кудось а кенериль чамомо — таго свадьба. Мейле кудазорось ормалгадсь, таркасто а стякшныль — таго эзь смея церась одирьва кудос ветямс. Истяк сацтызеяк шканзо.

— Пасиба Пазонтень, весе тевень содыцят, роботадо а пелицят, — крестни конянзо Лиза баба. Ды лиятакс улемс тенст а кинь пельде. Аваст пиже тейтернекс, кемготово иесэ, ушодсь фермасо скалонь потявтомо, важодсь-сявтась тосо 50 иес, зярс эзизь ильтя пенсияв, кода ламо эйкакшонь чачтыця аванть. Грамотанзо зяро — каштыкельксэнь стенатнень сатовольть вельтямс. Вейкень кис, кона, кода корты Лиза баба, «Президиумонть пельде», сонензэ пенсиянтень путнить колмосядт целковойть. Ярмактне апокшт, ды ялатеке тешкс, комсь вете кшить кисэст тескень лавкасто рамат.

Морамо лувонть те пень бабатне лецтизь уш пенсияв туемадост мейле. Таргизь-кепедизь горобиятнестэ кезэрень оршамопельтнень ды ламонь перьгелесть уш сынь. Вана ушодськак сестэ Лиза баба тейтерензэ марто одс эрзянь оршамопеленть стамо-мазылгавтомо.

— Лиза патяй, а тон некшнить неть оршамопельтнень малавиксэть лангсо?

— Ды кода эно, тейтерем! Бабам кулоськак эрзякс, эсензэ анокставт оршамопельсэ, карьсэ. Моньгак улить карень. Оршамопелемгак улить.

— Невтьсыть?..

— Невтьсынь!

Лиза баба таргась ванькс тапаркс ды ушодсь сравтнеме таркава, столь ланга оршамопелензэ.

— Руцянть монсь наряжия бувалань руця лангсто. Вана неть викшневкстнэяк эйсэнзэ бувалань. Те рукава. Те икельпаця. — Семилеень эрзяватне истя вана якасть…

Мейле Лиза баба невтинзе пиле прятнень, конатнень истя жо сонсь стынзе-мазылгавтынзе, бувалань паця конянть путызе прязонзо, евтнизе-невтизе, кода сон сюлмави… Ванан лангозонзо ды сельмень икелев сти Фекла Игнатьевна Беззубова. Истямо жо паця конясо, кодамокс сонзэ содылинек умок шкань эсенек эрзянь литературань ды келень тонавтома книгатнестэ.

Лиза бабань моронзо куш нусманят, эрямонть лангс сон а пеняци. Эйкакшонзо перьканзо, аваст а стувтнить, весе шумбрат… Паз мартост!

 

Тамара Баргова

http://www.erzan.ru/news/kuvaka-dy-luzhanja-jerzjan-moros

Категория: Мои статьи | Добавил: tati (25.11.2009)
Просмотров: 852 | Рейтинг: 0.0/0 |
Всего комментариев: 0
Имя *:
Email *:
Код *:
...ERZINFORM
ОД СЁРМАДКСТ
[19.01.2010][Стихи]
Александр Арапов. С... (1)
[21.10.2010][Стихи]
Исланкин Юрий Иванов... (0)
[24.01.2010][Мои статьи]
Регина БУДАРИНА. Пут... (0)
[24.01.2010][Мои статьи]
Художники в СССР. Из... (0)
[21.10.2010][Стихи]
Исланкин Юрий Иванов... (0)
ВЕШНЕК
ЛОПАНТЬ ЯЛГАНЗО
  • Официальный блог
  • Сообщество uCoz
  • FAQ по системе
  • Инструкции для uCoz

  • Copyright MyCorp © 2024
    Сделать бесплатный сайт с uCoz