Тазаледе... тиринь веледе...

Вирь малава, пандо алга

Сравтовсь эрзяньТазалем.

Сонзэ эйстэ, сонзэ ланга

Монь ули евтнемс мелем.

Те енксонь мазый таркатне

Тиринь велем перька прасть.

Мазый цецяв, кстыев пандтнэ,

Кодат ансяк пангт арасть!

Эрямоськак пек лиякстомсь:

Дивань полавкст тенек састь.

Ужодо, сындест чатьмонемс

Мелем, евтан, тунь арась.

Сэрей, виде рунго церакс

Од палманть строявсть ульцяс.

Седейсэ а эрси мелявкс –

Толонок а маднить зярс.

"Сэнь толнэнть" пек уш учинек,

Пелинек допрок а сы...

Апак фатя пачкодсь тенек,

Кудонок умок ушты.

Ули мелем монь евтамо:

Велесэнек – таксофон.

Ков эряви, гайневтяно,

Эрьвань ули телефон.

Мельзэнь паро – школань кенкштне

Панжадо учить пакшат.

"Интернет", "компьютер" валтнэ

Умок сыненст а стакат.

Тиринь Тазале монь велем

Пек уцяскавкс маряви.

Зяро сонзэ ялгат емасть?!

Сон жо цвети ды эри!