ЭРЗИАНА эрзянский литературный сайт

ПРЯКСЛОПА
Категории раздела
Мои статьи [336]
Стихи [571]
КАВТО ВАЛСО
Статистика
Главная » Статьи » Стихи

МАСТОРАВА. Кезэрень пинге. Колмоце евтамо. Од коень-илань касома. СУРАЛЯ. Продолжение3
МАСТОРАВА. Кезэрень пинге. Колмоце евтамо. Од коень-илань касома. СУРАЛЯ. Продолжение 3
 
в начало

Тумоатякшось кежтнень пандынзе.

Тонавтызе сон истя Суралянь

Седеймарямо, оймень жалямо.

Ней эрявсь тензэ парояк теемс,

Алтазь сюпавчинть муемс сонензэ.

Тусь сон ливтямо сэрей менельга

Тештнеде алга, пельтнеде верьга.

Ливти сон чинь перть, ливти сон вень перть.

Чи валдосто сон чоподас сови,

Чоподасто сон чи валдос лиси.

Аволь вейке чи истя сон ливтясь,

Аволь вейке ве икелев капшась.

Сизьгемень сисем менель пачк ютась.

Сизьгемень сисем покш масторт онкстась.

Прок сиземазо Атякшонть арась —

Апак оймсе сон чиньстямов ливти.

Вешни церантень алтазь парочи.

Ансяк ков седе васов сон ливти,

Тов седе парсте Суралянь кирди.

Бажи а правтомс сон паро церанть,

А ертомс-каямс селмонзо лангсто.

Вана васоло кармась касомо

Икелест кудо. Пижень сон ульнесь.

Сэрезэ сонзэ мик менельс токась,

Совась пельтнень потс цитниця прязо.

Те кудонть малас Атякш валгонесь.

Кортась истяня од Суралянень:

  Те кудонтень тон ней азе совак.
Каршозот лисить ломанть вастомо.
Колмоксть сюконяк модас тон сыненст,
Сюкпиря тенст макст ды мейле евтак:
«Мон куломадо лелянк идия,
Оймень саицянть кедьстэ нельгия.
Мезе макстадо, евтадо, монень,

Бути сонзэ мон невтьса ней тыненк?»

Кармить идемень пижень ярмаксо,

Алтыть рамамон, паряк, лиясо.

Мезеяк, цера, кедьстэст иля сайть,

Вешть пельдест ансяк гигирень парго*,

Конань сынь кекшизь бабань парентень.

Сураля совась пижень кудонтень.

Колмоксть сюконясь вастыцятненень,

Сюкпря сыненст макссь, мейле евтась тенст:

    Мон куломадо лелянк идия.
Мезе макстадо кисэнзэ монень?
Эрьга максынка гигирень паргонть!
Сыньгак каршонзо колмоксть сюконясть,
Сюкпря тензэ макссть ды мейле евтасть:

    Анак куш мезе! Мезе мелеть сайть!
Гигирень паргонть минь а макссынек.
Эрямодо пек сонзэ ванстано.

Велявтсь Сураля пижень кудостонть.

    Гигирень паргонть,— мерсь сон,— эзизь макст.

    Иля мелявто, цера, тень кисэ.
Адя озака мекев селмон лангс,—
Тумоатякшось кортась сонензэ,—
Паряк, тееви арсезь тевенек
Лия таркасо, лия енкстнэсэ.

Таго кувака кинть сынь поладызь.
Кузсть истя верев — мик лексемс стака.

    Варштака алов — мезе неяви?—
Тумоатякшось мерсь Суралянень.

    Весе масторось монень неяви.
Минек удало ине тол кирвайсь,
Цятор качамо пешти менеленть.

    Те пижень кудось, Сураля, палы.

 

Вана икелест стясь сиянь кудо.

Чи валдо моли эйстэнзэ лыйнезь.

А вановаткак — весе сияжды,

Сокоргадат мик — истя цильдерди.

Сонзэ малас валгсь Тумоатякшось,

Мерсь Суралянень, кода васняяк:

  Те кудонтень тон азе ней совак.
Вастыцятненень истяня евтак:
«Мон куломадо лелянк идия,
Оймень саицянть кедьстэ нельгия.
Мезе макстадо монень кисэнзэ,
Бути нейке мон сонзэ невтьса тенк?»
Кармить идемень сиянь ярмаксо,
Алтыть рамамон, паряк, лиясо.
Мезеяк кедьстэст таго иля сайть.
Вешть пельдест ансяк гигирень парго,
Конань сынь кекшизь бабань парентень.

 

Сураля совась сиянь кудонтень.

Колмоксть сюконясь вастыцятненень,

Сюкпря сыненст макссь ды мейле евтась:

    Мон куломадо лелянк идия.
Мезе макстадо кисэнзэ монень?
Эрьга максынка гигирень паргонть!
Сыньгак каршонзо колмоксть сюконясть,
Сюкпря тензэ макссть ды мейле евтасть:

    Куш мезе анак! Мезе мелеть сайть!
Гигирень паргонть минь а макссынек.
Эрямодо пек ванстано сонзэ.

Тестэяк церась лиснесь чавонь кедть.

Седеезэ мик сонзэ ормалгадсь.

Лоткась кемеме муемс уцясканть.

    Гигирень паргонть эзизь макст монень! —
Ризнэзь пшкалесь сон нармунь ялганстэнь.

    Иля мелявто нейгак, Сура ля.
Паряк, тееви арсезь тевенек.
Адя озака мекев селмон лангс,—
Тумоатякшось мерсь од церантень.
Яходсь кавксть-колмоксть сон селмосонзо —
Менельс кепететсь седеяк верев.

Ливтясь аламос ды мерсь церантень:

    Сиянь кудонть лангс, ялгай, варштака,
Ванока, мезе теевсь мартонзо.
Варштась Сураля сиянь кудонть лангс —
Равжо качамсо копачазь кудось.
Качамонть потсто толонь кельть лисить.

    Ней кундак монь эйс седе кеместэ,—
Суралянень мерсь Тумоатякшось,—
Эряви курок прядомс ливтямонть.
Налокс венстизе сон кшнинь нерензэ,
Ливти — прок налкси раужо ендол.

*Гигирень — килеень керень.

Продолжение следует





Категория: Стихи | Добавил: tati (17.01.2010)
Просмотров: 826 | Рейтинг: 0.0/0 |
Всего комментариев: 0
Имя *:
Email *:
Код *:
...ERZINFORM
ОД СЁРМАДКСТ
[19.01.2010][Стихи]
Александр Арапов. С... (1)
[21.10.2010][Стихи]
Исланкин Юрий Иванов... (0)
[24.01.2010][Мои статьи]
Регина БУДАРИНА. Пут... (0)
[24.01.2010][Мои статьи]
Художники в СССР. Из... (0)
[21.10.2010][Стихи]
Исланкин Юрий Иванов... (0)
ВЕШНЕК
ЛОПАНТЬ ЯЛГАНЗО
  • Официальный блог
  • Сообщество uCoz
  • FAQ по системе
  • Инструкции для uCoz

  • Copyright MyCorp © 2024
    Сделать бесплатный сайт с uCoz