ЭРЗИАНА эрзянский литературный сайт

ПРЯКСЛОПА
Категории раздела
Мои статьи [331]
Стихи [571]
КАВТО ВАЛСО
Статистика
Главная » Статьи » Стихи

Иван Алексеевич Калинкин. Ине Эрьзянень пшкадема. Сонетэнь каштаз

Ине Эрьзянень пшкадема

         Сонетэнь каштаз

 

1.

Молить иеть. Менельсэ од тештть

Чачить. Сынст валдост кувать сырежди.

Молить иеть, ды ломанень мештть

Тонь ойметь, Эрьзя, кеняркссо эжди.

 

Тонь ойметь тундокс кецявты монь.

Виевгавты эйсэнь сюпав кизэкс.

Ды оятнень эрямос умонь

Таргавсь сонзэ а неявикс кизэ.

 

Весе оян марить ды неить:

Гайтев слават увны, прок ведьбрамо.

Моданть лангсо мельспаро теи

Тонь ине а мадиця эрямось.

 

Покш уцяскань валдочинь паломанть

Ломантненень панжить гений ломанть.

 

2.

Ломантненень панжить гений ломанть.

Од ки лангов тердиця вандыть.

Стакачитнень ало апак кома

Сынь икелев зорятнень кандыть.

 

Сынь чи валдонь превсэст ды оймесэст

Мода лангонь мазычинть ванстыть.

Секс мештест артозь менель тештесэ,

Кумаць лангс лемест сырнесэ стыть.

 

Секс весе народтнэ паро койсэ

Знамякс неть ломантнень ванстыть свал.

Ды течи, Эрьзя, сонетэнь жойтьсэ

Родной кельсэть ёвтан седей вал.

 

Мазычисэ эрямонок пешть,

Свал эсь тевсэть валдо чикс сыреждть.

 

3.

Свал эсь тевсэть, Эрьзя, чикс сыреждть.

Валдот шканть кавтов явизе састо:

Неян росань петнявкст – сырнень пештть, -

Срадсь Россиясь – од эрямонь мастор.

 

Сельметь, Эрьзя, валдосто цитнить.

Тон лугава эскалят келейстэ,

Ды цецятне эсь рунгост витнить,

Прок виемить од варштавксот эйстэ.

 

Вакссот, Ока чирень килейкс стязь,

Сонсь Есенин моли ве киява.

Ды мизолды лембестэ истя,

Мик цековт чатьмонить чувтнэнь прява.

 

Весе ванстыть тынк ойменк паломанть,

Истятнэнень макснить а куломанть.

 

4.

Истятнэнень макснить а куломанть.

Тынк уцясканк – мазый евксонь тев:

Вейкенть пси валось сравтни талноманть,

Омбоценть кедесь вельмевти кев.

 

Тынк седейтнень сюпавчидест сестэ

Уш минек масторонок содась.

Виев меште лангсонзо чевтестэ

Эсь цёратнень кандсь тиринь модась.

 

Вансь лангозонк чись манейстэ палозь,

Прок бажась ёвтамс тенк лембе вал.

Тынь арсиде те менеленть ало

Мазычи ломаннень каземс свал.

 

Зярдо чинть а кекшить равжо пельть, -

Од васолкстнэс тердить валдо мельть.


5.

Тон, Эрьзя, од васолксс тердильть мельть,

Туить а эсенек менель алга.

Ды вастыть эйсэть шныцянь вайгельть,

Козонь ансяк пильгеть иляк чалга.

 

Но ульнить тон свал тевень азоркс,

Нильтяня шнамонть седейстэть ёртыть.

Эзить кирде кодамояк кор

Ды эстеть потмо вайгельсэ кортыть:

 

«Мельсэть свал чачома ёнкстнэнь кирдть.

Бути тон лиякс кармат эрямо, -

Кить пирясызь а ютавикс вирть,

Пандо кевть кармить лангозот прамо…

 

Зярдо тиринь модась мартот вейсэ, -

А онкставикс вий лаки тонь эйсэ».

 

6.

А онкставикс вий, Эрьзя, тонь эйсэ.

Велькссэть палы Аргентинань чись,

Тосо Моисей ине седейстэть

Покш кецямокс ломантненень лиссь.

 

Ойметь тюссо ламо образт артозь,

Тон сыненст максыть эрямо покш.

Тон эскельдить а куломас мартост,

Пильгеть ало – гайтев славань текш.

 

Но чокшнень эли валскень зорява,

Ансяк нурька ютко шка муят, -

Сти Россиясь икелеть, прок ават,

Арсемасо каршанзо уят.

 

Ды марявить теть тиринь вайгельть, -

Тонь, Эрьзя, Россиясь терди вельть.
 

7.

Тонь, Эрьзя, Россиясь терди вельть.

Тон содат, куш а неят эсь сельмсэ:

Тиринь модат велькссэ – стака пельть,

Сонзэ ят тапи потковазь кемсэ.

 

Сеть оштнень пулты, косо эрить.

Но кеци ине седееть сенень,

Што покш кевстэнть, конань тон керить,

Ней, икелев тердезь, ванны Ленин.

 

Весе тензэ, прок эстест, кемить,

Тон сонензэ, кода чинтень, кемат.

Кемат: пельтне менельстэнть ёмить,

Марят, кода седеяк виемат.

 

Зярдо ине ялгань вал седейсэть, -

Пек виемат сонзэ од манейсэнть.

 

8.

Пек виемат сонзэ од манейсэнть,

Витьстэ кирдсть минек солдатнэ кист,

Кемсть: чачома таркатнесэ вейсэ

Учить тиринь аваст, пакшаст, нист.

 

Истя тон, Эрьзя, ине седейстэть

Виень пелькс ломантненень явить,

Толонь пачк эскелить мартост вейсэ.

Оймень псисэть душманонть чавить.

 

Прянзо синдезь чииль ятось тосто,

Ков минектне эсь толонть каильть.

Дивиль ятось, а чаркодиль, косто

Неть ломантне зняро вий саильть.

 

Пек стака теде сенень содамс,

Ки бажи лиянень терть кодамс.

 

9.

Ки бажась лиянень терть кодамс,

Сень лепштясь ломанень кежень пелесь.

Теньс бажась, Эрьзя, паксянь модась,

Теде арсесь Баевась – тон велесь.

 

Паксяв тейтерь-аватне якасть,

Топавтсть эсест, топавтсть цёрань тевтнень,

Бутрав човсо Раторось лакась

Ды чаравтсь Тургеневань ведьгевтнень.

 

Неть ведьгевтнень вакссто пулев кись

Качамов паксятнень эйс пачкодиль

Эрзянь ёнксонь почтсто панезь кшись

Алянь вийсэ ятонть мештьс вачкодиль.

 

Ятось бажась минек неемс правтозь, -

Сонсь кумажа лангс ульнесь пульзявтозь.

 

10.

Сонсь кумажа лангс ульнесь пульзявтозь

Ятось. Минек пшти кежсэнть керявсь.

Сон, Эрьзя, масторстонок потавтозь.

Те кулясь тонеть прок кошт эрявсь!

 

Арсемасот неят: церабайнеть

Фронтсто сыця тетяст мештес прасть.

Кедезэст тештнень-медальтнень сайнить

Ды каштансто верьга кандыть пряст.

 

Тундонь коштсонть лёмзер цветнэ велить,

Цветить ават, теке умарь чувтт.

Ды васоло Баеванть, тонь веленть,

Кенярдовтыть гайтев моронь увтт.

 

Эсь мастордот тон бажить содамс,

Тошкить: «Монь Россиям, мон модам…».

 

11.

Тошкить: «Мон Россиям, монь модам…».

Тонь, Эрьзя, Россиясь яла тердиль.

Сонзэ ёндо зорясь стиль кода,

Пандтнэнь велькссэ знамякс сон якстердиль.

 

Лакась мелеть сонзэ ваксс куземс

Ды алонзо печтямс весе иеть,

Чачома масторонтень каземс

Эсеть сюпавчить ды ойме виеть.

 

Ризксэть марязь, тонеть венстясь кедь

Авань седей вечкевикс Россиясь.

Кадовсть васов масторт, иневедть,

Тонеть цитни вастомань часиясь.

 

Вана тиринь келей модась сравтозь,

Сон вастынзеть седеень кецявтозь.

 

12.

Сон вастынзеть седеень кецявтозь.

Кецят родной ёнксонь моронть жойтьс.

Ламо иеть васоло ютавтозь,

Сыть героеть марто Саранскойс.

 

Ней чистэ мартот вастомо яксить

Сеть, кить виев самолетт ветить,

Кинь кедь вийсэ цветить сюронь паксят

Ды электротештетне светить.

 

Сынст паро ёжосост, лембе мельсэст

Тон поладат эсь эрямонь кинть.

Ды монень неяви: моданть вельксэс

Вейсэ тынь кирвастнетядо чинть.

 

Ламо паро саят садонть эйстэ,

Бути важов чись ваны манейстэ.

 

13.

Бути важов чись ваны манейстэ,

Паксясо сюрось парсте касы…

Эрьзя, ойметь эждимим тантейстэ,

Зярдо тонеть васенцеде сынь.

 

Шержей пандокс Моисей монь ваксс

Лоткась, варштась домкасто сельмезэнь.

Мазычис сырнень панжомат макссь

Тундонь вийсэ пештязь од кедезэнь.

 

Ды, се чистэнть саезь, мон эрян

Истя, прок свал мазычинтень чиян,

Рунгонь санстон менель вийть марян,

Пандо текшонь нармунекс селмиян.

 

Зярдо венстязь селмотне келейстэ, -

Коштс нармунесь кепети сэрейстэ.

 

14.

Коштс нармунесь кепети сэрейстэ…

Те меленть, Эрьзя, саия превс.

Туинь а яван модам, оян эйстэ,

Весе вием путан лезэв тевс.

 

Зярдояк а велявтанте кистэнть,

Прям эрявикс ломанекс марян.

Ды тень кис теть, ине ломань, чистэ

Покш пасиба седейстэнь мерян.

 

Мон течи, Эрьзя, тонеть седейстэнь,

Кода садсто цецят-валт сезинь.

Вейс сюлминь неть цецятнень кеместэ

Ды сонетэнь каштаз теть казинь.

 

Зярс монь пельде лия иля вешть.

Молить иеть. Менельсэнть – од тештть.

 

15.

Молить иеть… Менельсэнть – од тештть

Ломантненень панжить гений ломанть…

Свал эсь тевсэть, Эрьзя, чикс сыреждть,

Истятнэнень макснить акуломанть.

 

Од васолкстнэс тердить валдо мельть,

 А онкставикс вий лаки тонь эйсэ.

Тонь, Эрьзя, Россиясь терди вельть,

Тон виемат сонзэ од манейсэ.

 

… Ки бажась лиянень терть кодамс,

Сонсь кумажа лангс ульнесь пульзявтозь.

Тон тошкить: «Россиям, монь модам…».

Сон вастынзеть седеень кецявтозь.

 

Бути важов чись ванны манейстэ, -

Коштс нармунесь кепети сэрейстэ.
  
 
 



 

Категория: Стихи | Добавил: tati (01.11.2009)
Просмотров: 544 | Рейтинг: 0.0/0 |
Всего комментариев: 0
Имя *:
Email *:
Код *:
...ERZINFORM
ОД СЁРМАДКСТ
[31.10.2010][Стихи]
Александр Арапов. К... (0)
[24.01.2010][Мои статьи]
Художники в СССР. Из... (0)
[21.10.2010][Стихи]
Исланкин Юрий Иванов... (0)
[21.10.2010][Стихи]
Исланкин Юрий Иванов... (0)
[21.10.2010][Мои статьи]
Исланкин Юрий Иванов... (0)
ВЕШНЕК
ЛОПАНТЬ ЯЛГАНЗО
  • Официальный блог
  • Сообщество uCoz
  • FAQ по системе
  • Инструкции для uCoz

  • Copyright MyCorp © 2017
    Сделать бесплатный сайт с uCoz