Од Ие

Од Ие совась минек велес

Ды лембе валсо эрзякс пшкадсь:

 - Кить тукшность тестэ Моданть келес,

Кить оймень сезнезь кудост кадсть?!

Вечкевикс эрзят, мекев садо

Тей, косо покштянк-бабанк чачсть,

Ды пильге лангс од азоркс стядо, -

Мон содан, оят, пекенк вачсть.

Ды аволь ансяк пекенк чавот,

Мик валдо ойменк ченгсть ды чамсть,

Ды ялатеке сынь эзть яво

Те ёнксонть эйстэ, косто пансть…

Минь эрзят, аволь вармань крандазт,

Санганок чуди шумбра верь, -

Садо, стявтодо кудот, кардазт,

Чачтадо цёрат ды тейтерть!

…Мон молян веленть кувалт састо,

Сэнь ковось валги кальтнень потс.

Од Иесь канды пандтнэнь прясто

Од ловсто кодазь ашо коцт.

http://fotki.yandex.ru/users/fes-vov1/view/182916/?page=2