|
|
Мария Ерёмина. Лирической миниатюрат
Кортатано вановтсо
Вастынь тонь
сельметь. Истят малавикст-малавикст. Кортатано вановтсо, весементь
ёвтасынек сельмсэ, валтомо. Мезекс валтнэ, конат сезьсызь сэтьмечинть?
Арась, сынь а эрявить. Монень. А тон, чарькодьсак монь седеенть?
Мон неитинь, неинь тонь сельметь. Ваявлинь сынст иневедентень, ансяк
мекс-бути ютан вакска. Кода тонгак. Вастовить кинек ды туить эрьванть
лияв. Таго явовить вановтонок. Чопода тень, зярдо арасть маласон тонь
сельметь. А саты сынст сэтьме лембесь, конась максы монь седеентень
эрямо. А кемат вановтсон ёвтазь вечкемадо моронтень? Учат
манчема? Арась, сельмтне видестэ кортыть, ёвтасызь весементь. Ансяк
эряви маштомс ловномо ёвтазенть, чарькодемс эйсэст невтезь арсеманть. Мекс чатьмонят, кекшат вановтот? Мезенть пелят невтемс? Ютан вакска… Кадовить удалов. Ды вана марян: пшкадсть тень сельметь.
Ливтить лопат…
Ожо лопат, сырнень лопат. Ливтить коштканть, ацыть моданть. Шождат,
салавить вармантень. Эрьва лопасонть мизолды чись. Ютазь кизэнь чись.
Маней, лембе. Косо ней сон? Пильге ало. Прась, ёмась. Нейсы сонзэ
ломанесь? Лопатнеде ламо, ломанень тевтнеде – седеяк. Эрьвась капши.
Кенери-арась? Лопатне жо прыть, яла прыть. Вельтявсь модась мазый
ацавкссо! Ансяк сон а куватьс саты – чополгады, олы. Косо лопась? Косо
кизэнь чись? Кадовить ансяк ломанень арсемас… ды шкань ютазь
стувтовить. Ёвксонь нармушкакс валгсь пильгень алов укшторонь
лопа. Кепедия сёксень казненть, ваннан эйсэнзэ: верень тюссо артозь,
менельаванть сельведьсэ шлязь. Мазый ды киненьгак аэрявикс. Вейке чинь
эриця. Течи кенярдстат сельмть, седейть, ванды… Ожо лопат, сырнень лопат. Сёксень маней, лембе чить. Ютыть ломанть, ливтить лопат… Ливтить течи, ванды – прыть.
Учимим
Капшан, пелян лиядомс. Чиян, ливтян. Учомак, илямак кадо. Кирдевть
аламос, мон нейке. Вармакс, нармунекс. Седеесь чави, анок кирнявтомс
мештестэнть. Модась а маряви пильгем ало. А неян кинть, а неян
пертьпельксэнть – мельсэм тон, тондеть арсематне копачизь, прок сувсо,
весементь. Кудотнень, ломантнень. Сынь ней монень а эрявить… Ансяк тон
аштят икелем, тонь эйсэ те шкастонть монь эрямось. А учосамак – кулан,
ёман… Алкукс: ёман, солан тундонь ловокс, пран сёксень лопакс. Оинем,
учок аламос, чарькодемак. Седеесь а оймави, мари зыян. Стака
мельтне лепштить эйсэнзэ: кадсамам, туи монстемень. Чополгады чись неть
арсематнеде, а саты коштось. Кадыть эйсэнь вийтне. Арась, эряви
кемемс: Пазось лезды монень, лоткавтсы шканть. Эряви кемемс: учосамак,
кирдеват монь кисэ, а кадсамак. Эряви кемемс: сатыть виень пачкодемс.
Ды чиян. Икелев. Тонеть. Нать, а марят седеем, а чарькодят талномам.
Ки-и-рде-е-вть! Мизолкс чамасом, уцяска сельмсэм. Тон учат, эзимик
кадо. Аштят таркасот. Автобусоськак, конантень мон пелинь а кенеремс,
теске… Стувтовсть весе мелявкстнэ, апак пеле ютан Тонеть. Уцяскаван.
Тундонь мизолкс
Марясак, кода эскели тундось? А кодат сонзэ моронзо?! Кодат ёвкст сон
ёвтни, кодат онт кази… Тундонь. Нейсыть эйзюротнень сельведест? Иля
нусмакале, сынь – уцяскавт, валдт, эйсэст – сыргозиця моданть
кенярксозо, маней чинть мизолксозо. Токась седеезэть панжиця лопинесь?
– те тундось сонзэ вельмевтизе оймекоштсонзо. Вельмевтьсынзе сон
седейтненьгак, эекс кельментькак солавтсы. Иля арсе, тонтькак а
стувттанзат, а кекшеват. Кемат? Лекстяк кошттонть, марясак: сон
лиякстомсь. Весе пертьпелькссэнть вельми од эрямо. Ваньксстэ ваны
лангозонок менелесь. Косо пезэ-потмаксозо? А содат, ды, паряк, сон
араськак?.. Сон певтеме, кода уцяскась. Нама, вастневить лангсонзо
пельть, ансяк тень кувалма иля мелявто. Сынь туить, кода телесь поты
тундонть самсто. Тундо… Зяро тонеть алтазь кемемат, зяро седейть тонь эйсэ неить идема. Лездат? Тундо… А вешан кедьстэть мезеяк, мон истякак кенярдан. Монь седейсэнь – тундо.
КАШТМОЛЕМАНЬ МОРОТ
Эскелькс, кавто – кашторкс, кашторкс… Синдян лопатнень мазычист, а кеме
сон, секскак а куватьс ванстови. Сырнень палят, сырнень ацавкст,
сырнень валт ды сырнень морот. Валтнэ – лопат. Сезевсть тарад пестэ,
ливтясть-велясть ды прасть. Вельтизь моданть. Моротне – каштмолема.
Арасть морыцятне, кадызь пужиця ёвксонть. Лембе тенст эряви, лембе. А
тесэ – сельведть, варманть-вергизэнть увномазо – кельме теленть
оймекоштозо. Молян састо-састо. Ков капшамс? Икеле мезеяк вадря
арась. Кирдян шканть, ансяк а лоткавтови, чии, прок пелиця нумоло. Ков?
А содан. А соды менелеськак, кона стака арсематнеде новольсь алов;
кирдить эйсэнзэ сэрей чувтотне. Тарадост пезнасть тусто пельтнес,
бажить муемс чинть. Ансяк а топавтови мелест. Чинь толонть мадстизе
пиземе ведесь…
КЕМЕМС?
Маней чи, маней мельть.
Кеняркс, покштояк покш кеняркс! Менить те качамостонть, те тусто
вирьстэнть, косо эрьва чувтонть экшсэ эйсэть учось кулома. Саты,
прядовсь те стака онось, конань эйсэ неить кавто иеть. Кавто иеть… те а
кавто чить, а кавто ковт. Ды весе те шканть перть тон эрить ве мель
марто – те прядови, ды тон велявтат сенень, кие эйсэть учи, кие свал
арси тондеть, кие удомстонзояк тошки тонь леметь, кие вансты тынк
вечкеманть, кода сехте питнеенть, мезе ули модамасторонть лангсо.
Эзить кеме ялгатненень, конатнень марто вейсэ валовсь тонь ливезесь,
вересь, конатнень марто вейсэ якиде Чечнянь пси моданть ланга ды эриде
эрямодо арсематнесэ. Марявсь теть, сынь а чарькодить, сынь а содыть
истямо вечкема, а неить сеть кшниде кеме килькштнень, конат сюлмить
эйсэнк шканть ды вайгельбетнень лангс апак вано… Ды кемить, учить…
Кода арситькак, тонь самонь чись ульнесь маней. Эрьва часось нардтни
ютксонк вайгельбетнень, ды тон прок сёлмо лангсо ливтят тов, ков мезе
вий уски, терди эйсэть седеесь. Окойники! А кемеви: течи нейсак. Сонзэ!
Мейле уш молят ават туртов. А ней – сонензэ! Чопода пельсэ
вельтявсь чись, стака сувсо копачавсь модась. Лиссь аёвтавикс покш
зыян!.. Кулось вечкемась… Прасть кедьстэть цецятне, лоткасть
цивтёрдомодо мештьсэть медальтне. Нардтневсь мизолксот. Арсить вастомс
вечкевикс тейтереть – икелеть ве ёндонь ломань, лиянь ни. Эзь учо, эзь
вечке. Ёвтась кельме поздоровт самот кувалма ды… седе тов мезеяк. Тусь
эрямостот. Тарказонзо кадовсь чаво тарка. Ды сэпей апаро.
Порксыть превть: мейсэ манявить, мекс кемить сенень, кие а кирди эсь
валонзо? Мекс эрямось истя кежейстэ налкси мартот? Кувать неть мельтне
кармить ливтнеме велькскат. Ды ансяк вейкесь зярс кадовсь
чарькодевиксэкс: сехте виев, сехте кеме аванть вечкемазо. Сон свал
учотанзат тонь, эсь эйдензэ.
ИЛЯ ПРА
Од ломанесь –
норовжорч. Свал бажи верев, чинтень. Моданть малава ливтнемс а ён.
Седеесь мештьсэнть чави, кутьмерьсэнть сёлмотне виевть. Кись – келей,
вановтось – маней. Пачкодят сехте тёкшонтень! Моразь! – Ванодо, ломанть, ванодо, тештть! Мон – сонсь Пазось!
…Чаразь-велязь пры коштсонть. Алов. Модантень… Сезевсь морось:
норовжорчонь седеенть пицизе чись. Сон вадря васолдо, маласо жо –
кежей. Прась нармунесь ды эзь стяво. Аволдаволь сёлмотнесэ –
арась, сынь усковить моданть ланга, стакат. Тенси нармунесь гуекс
менчевиця янонть, кунсолы лиянь морот.
ВАНДЫ ЭКЗАМЕН
Видькстан, вестькак истя эзинь пеле. Те кодамо-бути тамашань тев. Кода
улемс, ков молемс? Ваян, ёман. Авака-а-ай! Косто учомс лезкс? Прям,
теке оска, эйсэнзэ весе човорявсь. Кодат превть?! Стувтыя кодамо течи
чизэ… Те ней, а ванды мезе карми? Вай, менелесь кеменев лазоволь – седе
вадря улевель. Ды монь пильгеньгак якамодо лоткить, сорнан, прок
нумоло. Маряви, седеем кассь эйшкан, сур пеньгак прок Московонь
куранттнэ чавить. Мезекс истят майсемат кочкинь, арази а содылинь, ков
молян?! Ансяк сестэ марявсь – иневедесь тень кумажава, эряви –
менельстэ ковонть валгстса. Кие содась, кодамо те чадыведь. Перькат
весе пикси, зэрни. Кинень эряват? Снартан монсь уеме, капшан муемс
лисевксэнть. Чить ды веть пештян прянть, чулган книгатнестэ
содамочинть. Тей! Тов! А ярсамот, а удомат. Верепаз! Ульть
седеймарицякс, чевтелгавтык вандынь кунсолыцян оймензэ. Казть тень
кеняркс. Марсинь, пелеветь стякодонь казнеть кундсить, "халяват”,
ансяк, арсян, кода иля пижне–терде, "ветесь” аволь сезяка, пулодо а
кундасак. Ловнан вана уш зяроце книга. Мекс а компьютеран? Сельме
икелень букватне уить, цють а коткудавокс киштить. Ды кие арсизе те
певтеме тонавтнеманть?! Эряви нолдамс медальть сеть учёнойтнень туртов,
конат ёвтасызь эсь тевест сехте нурькинестэ ды сехте чарькодевиксстэ.
Сестэ, паряк, лоткить ламо томсо сочинениятнень сёрмадомо. Зяро конёв
ансяк ютавтыть. Сынськак, нама, студентэкс ульнесть, эли стувтовсь
тонавтнемань сталмось? Кода кенеремс зняронть тееме? А стяко
кортыть: экзаменс весементь тонавтнемс свал вейке чи а сатны. Кода
улемс? Ков молемс? Ансяк сатост билетэнь ускомс кедьвиень, а мейле…
роботак, пря, велядо, превень ведьгевть. Экзаменс арсян сыргамо
вете чассто, кавтошка част сави учомс корпусонть икеле, зярдо панжсызь.
Кода вадря – тонавтнян аволь врачокс, сестэ экзаменс пелеветь саволь
сыргамс. Кода эно, сынст студенттнэнь ютксо истя ладязь… Пелян…
АВАЙ, МОН ПАЗОНЬ НИ…
Лов. Ашо, ванькс, кельме. Пры, вельти кинть. Ловтештетне понав мекшекс
ливтнить шожда коштканть. Сэтьме, истя сэтьме, мик пилетнененьгак
стака, маряви ансяк мештьсэ чавиця седеесь. Седеесь, кана вана уш зяро
ковт а оймави, лепшти эйсэнзэ стака ризкс, мелявтома. Авась
велявтсь вальманть эйстэ. Ушонь валдодонть мейле кудо потмось марявсь
седеяк чоподакс. Ансяк арась мель сонзэ валдомтомс, авась превсэнзэ лия
таркасо, лия шкасо… Кудоськак ледстни ютазенть. Ирина
Владимировна Оля тейтерензэ марто эрясть кавонест. Ояксчисэ, вечкемасо.
Тейтерькась кассь аванзо сельме икеле, мелявкст эзь кандо. Вадрясто
прядызе школанть, апак маряво пачкодсь университетэнь колмоце
курсонтень. Мелезэль улемс биологокс, кода авазо. Сон састынькине
топавтсь те бажамонть – аволь покш, ды виде, кеме эскелькссэ.
Кенярдстсь аванзо, оянзо, весе пертьпельксэнть. Валдо вановтсонзо свал
панилинзе чопода мельтнень. Тевень вечкицяль, паронь арсицяль. Свал
аноколь лездамс. Пек вечксь морамо. Моросонть ёвтылинзе седей
мелявксонзо, кенярксонзо, казмль кемема. Кунсолат эйсэнзэ ды теке одс
чачат. Вайгелезэ сэтьме, ванькс. Зярдо Оля морыль, варштылить
лангозонзо – ды а содылик, истя полатовиль. Мерят, штатол кирвазиль
потсонзо. Тейтерькась прок аволь мода лангонь эрицяль, Пазонь
кучовтоль, валгсь менельстэ валдонь кандомо. Оля вечкилизе
теленть, ловонть. Кенярдыль парсеень ашо ацавксонтень, кунсолыль
ловнетнень ёвксост. Вечкилизе те ваньксчинть, кельменть псинзэ.
Мельсэнзэ прыця ловонь суретнева кузиль верев – эзь сатно тензэ модась.
Эрьва теленть самсто яла полавтовиль, полавтовиль. Ды вейке
истямо чистэ, зярдо прась лов, Оля ёмась. Сезинзе икелень эрямонть
марто сюлмавкстнэнь. Эзь муеве. Прок ведьс ваясь. Ирина Владимировнань
туртов чамсь пертьпельксэсь, чополгадсь чись. Косо вейкине тейтерьказо,
косо вечкевикс цецинезэ? Кувать, эрьва кува вешнесь авась эйсэнзэ –
стяко, эзь муеве. А ловось яла прась, прась, ансяк кода-бути
човорявозь, аволь Олянь моронзо–арсеманзо кувалма. Аванть мельс
ледсь, эли кодамояк вий тошкась тензэ: Оля а весть кортась монастырде,
Пазонтень алтазь эрямодо. Сеедьстэ мариль прянзо а эсь таркасо.
Ирина Владимировна поладынзе вешнеманзо. Ютынзе весе монастыртнень,
конатнеде содыль, – стяко. Зяро сельведть валсь, кодамо толсо палсь
седеезэ, – оймамось эзь муеве. – Верепаз, энялдан икелеть! Косо
Олинем, косо эйдинем? Мекс явимизь, нать, а нейсыть майсеман? Арась
эрямо сонстемензэ. Велявтык, максык. Арази а чарькодьсак сэредьксэм?
Ков тень молемс, кува вешнемс?.. Солась ловось, конань ланга тусь Оля. Прась лията. Ды кандсь учицянтень сёрма, седей пшкадема.
"Авай, тиринь авинем… Инеськеть, нолдык чумом, чарькодемак, кемемак. А
эряван мон се эрямосонть, а панжови тень смустезэ. Чаво маряви сон,
стяконь. Истямо кежде пештязь весе коштось, эрьванть вановтсо – пшти
сялдома, валтнэ калгодот. Ней монень паро, тесэ седеем чави валдонть
туртов. Авай, мон Пазонь ни…” …Кудось сэтьме, ледстни. Ютазь читнень, Олянь сиянь вайгелензэ. Ды арси. Паряк, тейтеренть эскельксэзэ виде?
А ВЕСЕМЕНТЬ НЕЙСАК ОНСТОТ
Онт… Кодат сынь ансяк а сыть удыцянтень. Улить валдот, мелень
кепедицят. Улить мекевланг. Улить, конатне валске марто а
ледстявитькак, улить, конат эрямонь перть а стувтовить. Озыть прязот
нармушка ладсо ды мейсэяк а паневить. Шкань–шкань сёлмонь либордомасост
невтить: тесан, а менят эйстэнь. Кой–кить кемить онтнэс,
"содыть”, кодамо смусть канды те эли тона неевксэсь. Путнить пряст онс:
кодамояк покш тевень ушодомань каршо чокшнестэнть, мадемадо икеле,
кевкстнить ононть, вадряс анокстамс прянть, аволь. А содан ансяк,
мезесь пачти вадря кулятнеде, мезенть неемстэ учомс беряненть. Паряк,
ломанесь весементь ладси эсексэнзэ? Кода кортыть, эрьва тевенть лангс
кавто вановтт. Сайтяно а покшке невтевкс: кавто цёрат пелькстасть
чийнемасо. Вейкесь эйстэдест, нама, саизе васенце тарканть, а лиятась…
Омбоценть эли меельценть? Ды истя свал. Ансяк онтнэс кемемась
кадови пек виевекс, а лавшоми пингеде пингес. Тувталось –лиясто онось
алкукскак педе-пес валови эрямос. Тынк истя арасель? А мон неекшнинь,
ансяк а пек ламо, колмошка. Паряк, киньгак ононзо весе истят?
Онт… Кортамось эйстэдест, бути ушодомс, зярдояк а прядови. Эрьвантень
ули мезе ёвтамс. Ансяк вейкенть каршо кияк мезеяк а мери: ломанесь
онстонзо зярдояк а кулы. Эрсекшни, неить куломадо мейле эрямонть, ансяк
те лията. Истяк жо, кодамо зыянс илязо понго, сехте чопода пентенть а
пачкоди: эли изнясы, эли сыргози. Кияк а соды, кода, зярдо эрямонь
суресь сезеви, онтнэяк тень а панжить. Ды, паряк, те вадряяк? Кемть
эрямос ды эряк. Бути мезе, тонь эйсэ свал учи сыргозема. Изняк
чоподанть.
ЭРЬБАНЬ "КАТКИНЕТЬ”
Вишкинеть, чевтинеть,
мазыйнеть… Эрьбань понав "каткинеть”! Эждятадо коштонть телень
якшамодонть, седейтнень – кежей валтнэде. Ушодтадо тундонть. Свал
кецявттадо сельмень, ледстневттядо эйкакш пингедем, сеть читнеде, зярдо
эрьбань пондакш пургондавкстнэстэ неинь уцяскань лисьмапрянть.
Эрьва ие эрьбань недлянтень кандылинек мазый, "каткине” марто тарадт.
Сынст мельга молемантень сазором марто анокстылинек икелев ды а весть
кевкстилинек авань: "Мекс эрьбань пургондавкстнэ истят ансяк аламос,
аволь иень перть?” Авам састыне, чарькодевиксстэ панжилизе тенек
пертьпельксэнь эрямонть молеманзо, кона ушодови тундосто. –
Тундось – сонзэ эйкакш пингезэ, од шказо. Весемесь теи васень
лекстявкс, эскелькс, пургонды, панжи мазый цецясо. Кизэнь куншкане
пурны вий, кона сёксенть самсто аламонь–аламонь лепами. Ютыльть
неть валтнэ прявам ды, таркань апак муе, ливтильть мекев, качамо ладсо
туильть менелентень, срадыльть коштканть. Кодат сыречить, кодат виень
асатыкст?! …Валгинь автобуссто, молян кудов. Каршом понгсь вишка
тейтерька, кона канды эрьбань тарадт. Кеци, секень вант, ливтнеме туи.
Арази те а мон, арази а монь сельмтне истя цивтёрдыть? Монгак ютан теке
кияванть, ансяк аламодо ве ёнга. Кепедия "каткине” марто тарадкенть. Чевте, лембе, васькавтыця… Теке эйкакш пингесь.
ВАРМАНЬ ЛЕВКСКЕ
Содатадо, кинень мерить вармань левкске? Арась?! А кеман. Кода истя, а
содасынк ялткенть? Сон улияк те левкскесь. Ды кемеде: кадык сон зярс
вишкине, пертьпельксэнь эрямосонть сон покш тарка. Ломанентькак а
стувтнесы, токшесы-вадяшасы. Несынек минь сонзэ ансяк сестэ, зярдо
авазо, вармась, уды. Лия шкасто а мерить тензэ элякалеме, аштевтить
сэтьместэ. Сон састынькине оргоди аванзо вакссто, кона сутями козоньгак
латко потмаксос, ды ушоды чийнеме-ливтнеме. Ютасынзе весе виртнень,
судрясынзе эрьва чувтонть черензэ, скирясынзе лейтнень чамаст,
кутморясынзе пандотнень-пандынетнень. А мезть сон паксясо тейни! Кунды
Нороваванть паля пезэнзэ ды ноцковтни. Прок катка левкс. Вели, чары,
кеверькшни! Мезеяк а теят, эйкакш. Сон аволь кежень пачк, чевтестэ. Ды
а кувать. Вант, ковгак лияв уш ношксты. Ков ней сон? Тонеть! Иля пеле
эйстэдензэ, сон вечки ломанть. Несак, кода нолси кедеть, сельмепонасот
куцти? Казть тензэ мизолкс, сон кенярды валдо ойметненень, теи тенст
ансяк паро. Кевкстят, кодамо? Пси чистэ нолдтни менельга шожда
пельнеть, кости пиземеде мейлень рудазонть, кенерсти сюрот, мастумарть.
Теевть тензэ ялгакс. Сон вишка нумолкайнекс чевтелгавтсы прамот, ашо
локсейнекс ванстатанзат зыянтнэде. Сон истямо жо эйде, ансяк вармань.
***
Сон сась стамбарнэ-стамбарнэ, эрьва эскельксэнть тейсь салавке — илизь
маря, иляст анокста вастовомантень. Вечки истя, апак учо. Ды те аламнеде а виде. Кода истя, апак учо? Эрьвась эйстэнзэ арсекшнесь, пельсь кельме лексемадонзо…
Ульнесь пси, ульнесь паро. Мазый, цецяв, уцяскав. Зяро кемемат, зяро
бажамот. Учомат, алтамот. Сон ульнесь кенярксчиде пешксе, чинь
мизолкссо артозь. Аламнеде каштангалиця. Паряк, превтеме. Капшиця.
Сёлмов. Тештев. Марявсь, свал истя карми. Ансяк… мезентень ульнесь ушодкс, карми пеяк. Ды а свал маней. Явшевсь кода-бути. Косо коморо, косо эле. Апак жаля, апак арсе.
Пужсь… ачарькодемадонть, мадстевсь… эрямонь тарьксэв пиземетнесэ,
раздевсь… пшти валтнэс, прась… чаво вановтонтень. Ды кияк эзь нее, кияк
эзь маря. Тонадовкшнось. А сон… кулось. Кизэсь. Вечкемась. Ней —
янксек, кить мекев вешнек. Стяко, а мусыть. Сынь лопасо вельтявсть,
вармасо нардтневсть. Икеле эрявсь. Икеле. Анокстамаль, паряк, идевель.
Мель явомаль. Кекшевлик, тапардавлик, ойме коштсот эждевлик. Нать,
алкукс, превтеме. Сась стамбарнэ-стамбарнэ. Умок уш малава
чарась. Ансяк пря эзь невтне, кекшнесь. Ды вана течи весе седейсэть
марик, неик —сась. Тесэ. Сёксесь. Явовомась.
*** Кассь
яла, верев бажась. Мелявтсь, мекс истя стамбаро шкась моли, мекс
пургондавксонзо кодаяк а панжить. Панжовсть — кармась чинтень
венстямост. Ды яла арсесь: кадык читне-ветне седе бойкасто
полавтневить, — истя лопанзояк седе курок сырнесэ валовить. Вечкевсь
тензэ те тюсось. Кода эно! Седей вити. Эли, седе видестэ, сельмть. Эрясь истя, учозь.
Учовсь. Сась сёксесь. Лопанзо — сырнень. Ды мезекс те сюпавчись, бути
сонзэ лангс а рамавить сеть апак неяво ютазь читне? Улема, сынь седе
питнейть.
*** Васень лов! Сон а меельце, Мельганзо
карми омбоце, колмоце… Ансяк кияк а мери: "Варштадоя, сисемеце лов
пры!” Кадык тона ули седе чевте, мазый, ванькс.
***
Весе ваныть яксярготнень мельга. Тунда — самстост, сёксня — туемстэст.
Яксяргот! А стувтнить цёковтнень, норовжорчтненб, цянавтнень,
письмартнэнь… Ансяк озязтнэнень кияк мель а яви. Мерят истя эрявияк.
Улить, ды паро. Паряк, те ломаненть превсэ- удемсэ уш чапозь: а
неемс сетнень, кить вакссот, а путомс сынст малавиксчинтень эрявикс
питне ды свал арсемс васолотнеде. Вадря, озязтнэ а кадносамизь. http://www.ifusco.info/ru/litkonkurs
|
| Категория: Мои статьи | Добавил: tati (13.02.2010)
|
| Просмотров: 1909
| Рейтинг: 0.0/0 |
|
|
|
