ЭРЗИАНА эрзянский литературный сайт

ПРЯКСЛОПА
Категории раздела
Мои статьи [331]
Стихи [571]
КАВТО ВАЛСО
Статистика
Главная » Статьи » Мои статьи

Кузьма Абрамов. СОЛДАТ ДЫ АВА. Продолжение
 см. Начало

СОЛДАТ ДЫ АВА

Евтнема

Вень чоподастонть цитнезевсть толнэть. Зярдо поездэсь пачкодсь эйзэст, авась, окойники, чарькодсь: эсензэ станциянть ютызе. Те ульнесь апокшке разъезд. Лотки ли тезэнь поездэсь? Секень вант, сон эзь лотксе сонзэ станциянтеньгак. Лоткавольгак, уш кодаяк марявлизе. «Вай, авакай-корьмакай, мезе ней теема?» Сон варштась омбоце пентень, косто цитнесь папиросань якстере сяткине. Вень экше вармась ды те апак учонь мелявксось панизь седейстэнть чияконь талноманть, оймавтызь кеженть, мадстизь ацирьгадоманть. Сон ней анок ульнесь таго пшкадемс солдатонтень ды вешемс пельдензэ лезкс. Те эзь тееве ансяк секс: лоткась поездэсь. Сон седе курок муизе кансткензэ ды кирнявтсь ки ютконь чова кевтнень лангс. Туемадо икеле серьгедсь кенкшканть вагононь чоподантень:

     Ладна уш, проштяйте, шумбрасто пачкодемс!..

Сон маризе, кода вагонсось капшамонть пачк эшкизе котелоконть, кода эскельдясь кенкшентень, ды эзь кенере варштамо — уш аштесь вакссонзо.

Ужо,  иля  капша  простямо,  коли  станцият ютавсь,  минь оштё мекев ардтано,  — мерсь солдатось.

Нать, вечкевсь теть ардтнемс мекев-васов? — пеидезевсь авась.

Солдатось комась пилезэнзэ.

     Тонсь вечкевить.

Авась аламос каштмольсь, мейле кежень сазь поладызе кортамонть:

     Кинень эряви те  превтемень лавгамось?  Эли, паряк,  арсят: улить тесэ превтеметь?..

Сынь пачкодсть лазонь теине перрононтень. Разъездэнь кудонть вакссо касыця топольтнень ало чоподастонть редявсь эземне. Авась сыргась се ёнов.

     Ней сави валскес лужалемс тесэ. Эрявсь жо тень матедевемс. Те шкас бу улевлинь кудосо, — мерсь сон озамсто.

Сэтьместэ тошкиця топольтнень эйстэ мольсь вень летьке экше. Солдатось путызе мешоконзо эзементь лангс, сорновтызе ве пеле шинеленть ды каизе аванть лавтовга.

     Леметь кода? — пшкадсь сон чевте вайгельсэ. — Минек весемесь лиссь аволь истя, кода эряволь. Ломанть теевить содавиксэкс лемень ёвтамсто, минь жо...

Сон эзизе прядо валонзо, каштмолезевсь.

Наське лемем... — Аламос аштесь ды поладсь: — Настасия Михайловна.

Мои вана дивсян,  косто содасак монь лементь,  эдь мои эзия ёвтне...  — кортазевсь солдатось.

Кода эно тонь леметь?  — капшазь кевкстизе авась.

Тон жо тень мерить Стяпан... Стяпан    лемем.

Те мои аволь тонеть, мирдем туртов. Мирдем лемезэ Стяпан...
Солдатось дивазевсь.

Мейс  тесэ  мирдеть?

     Цюдавсь истя, чарькодят, онстон неия... Маринь, буто ардан мирдем марто, — састыне кортась авась, теке, мерят, арсесь марямга. Друк сон велявтызе чаманзо вакссонзо озадо солдатонть пелев ды уш лия вайгельсэ мерсь: — Тонетькак, паряк, экше. На, вельтик кутьмереть, шинелесь саты кавоненек туртов...

Поездэсь, конасонть сынь састь, умок уш тусь. Чаво разъездсэнть сэтьме, ансяк топольтне тошксить чопода лопасост ды паксянть ёндо лиясто каяты вень нармунень вейкине вайгель. Менельсэнть а тештть, а ков, а пельть — ашти кодамо-бути ловтаня сув.

Солдатось лыкавтызе кедензэ, снартсь таргамо зепстэнзэ па­пироса, шинель полось нолажтсь кутьмерензэ лангсто.

  Саты   уш   секе   тев   потямс   качамонть,   — мельсапаросо мерсь авась ды витизе шинель полонть

  Мезе эно лия мерят теемс? — музгордезь пшкадсь солдатось.

  Лучи  ёвтнек войнадонть.

  Мезе  парось войнасонть?  Кортамскак ланганзо  а  сы ме­леть.  Содат,  — друк прась сон эсензэ валонзо трокс, — давай кортнетяно  вечкемадо...

  Ансяк аволь истя, кода снартыксэлить кортнеме вагонсо, — капшазевсь мереме авась ды мик аламодо шаштсь эйстэнзэ ве ёнов.

  Вагонсо... — мерсь солдатось ды кортазевсь седе тов: — Уш   бути  ледстнемс   вагононть,   сех  пек  чумось  тонсь.   Мезень апаро кармавтынзеть тозонь озамо а содавикс цёра марто? Веть. Нать, эзить чарькоде, ков эйсэть тердить?..

  Косто монень, превтементень, чарькодемс, — мерсь авась кода-бути ёжовсто ды, теке марто, пеедькшнезь.

Сонськак а соды мекс, те ломаненть вакссо сонензэ паро, паро марямс лембензэ, кунсоломс эчкине вайгелензэ. Сонзэ мельс ледсь умонь тев, зярдо сынь мирдензэ марто весть сыльть паксясто. Тусь виев пиземе. Стяпан вельтизе вана истя жо эсен­зэ пиджаксо, ды сынь мольсть, пизементь лангс апак вано, рядсек, лавтовдо лавтовс.

     А чарькодеви,  мейс тон  валгить поездстэнть,  эдь тонеть ардомс  седе  тов?  — кевкстизе  сон чатьмониця  солдатонть.  Эли, паряк, арсят ванды озамс пассажирскоентень? Сон тезэнь а лоткси...

Солдатонтень ульнесь а ён ёвтнемс, кода ашти тевесь алкукс ладсо, ды сон мерсь: озы кодамояк товарной поездс.

Истямо ладсо кортнезь ды чатьмонезь, сынь ютавтызь кизэнь нурька венть. Зярдо кармась ашолгадомо, авась пурнась килангов.

  Васов теть молема?  — кевкстизе  солдатось.

  Кавксошка  вайгельпе.

Авась оде сюлмизе пацянзо, саизе скамиканть лангсто канстонзо ды меельцеде варштась солдатонть пелев. Тона аштесь прянь комавтозь. Тюжа усанзо ало плотнасто пекстазь кургось неявсь чова лазкскекс. Чамаванзо таргавсть кавто потмура кикст. Авась чарькодсь, мезде сон истя нусманьгадсь. Сонензэ эстензэяк ульнесь мекс-бути  а шождыне таго кадовомс ськамонзо. Те нурька весь, конань ютавтызь вейсэ, теинзе малавиксэкс, сюлминзе кодамо-бути а неявикс сюлмосо. Сон  уш аноколь туеме скамиканть вакссто, зярдо солдатось, окойники, кепедизе прянзо ды неизе сезезь ковтанзо.

     Кадыть  тень,  небось,  ледстнемка,   — пшкадсь  звась.  
Стамаль бу, ды вана салмуксось арась.

Солдатось саизе прястонзо пилотканть, менстясь эйстэнзэ суре марто салмукс ды венстизе авантень.

     На, сялгик, а то истя а вадря, — мерсь сон.

Авась аламос аштесь салмуксонть марто, теке, мерят, эзь сода, мезе теемс, аштесь ды виздезь вансь солдатонть лангс. Тона чарькодсь, мейсэ тевесь.

     Каик, каик ковтанть, иля визде, мои туян ве пелев, 
мерсь сон ды сыргась перрононть омбо пев.

Зярдо ковтась ставсь, таго сась аванть ваксс.

Тон бу теня... максовлик адресэть, — мерсь сон энялдозь ды сорныця вайгельсэ.

Мейс теть адресам, нать, инжекс савлить? — пейдезевсь авась.

Инжекс а инжекс, паряк, хоть сёрмине сёрмадовлинь... а то эдь монень сёрмадомскак а ков... Ялгатне сёрмадыть, монень а  ков...  Паряк,  тонськак кучат...  Содат,  кодамо стака войнасо, бути тонеть а кинь пельде учомс куля...  — Сон аламос каштмольсь, мейле таго кортазевсь, састо, апак капша, валонть ёвтасы — аламос ашти. — Госпитальстэ лисемстэ аламос нолдыксэ-лимизь отпусков оймсеме. Ков, меринь, молян, коли а кудом, а семиям... давай, мерян, таго войнав. Эзимизь кучо, сёрмадымизь
запаснойс... Нама, ялатеке кучсамизь... Мои арсян истя: солдатонтень эряви воёвамс, зярс эзь маштово душманось...

Аванть чамаванзо рисьсэ чудесть сельведть. Сон сынст эзь нардтне, мерят, эзь фатяяк эйзэст, Чопода сельмечирькетне новольсть начко сельметнень лангс, теке потмура пиземе пельть сэнь менель чамантень. Сон чатьмонезь кунсолось солдатонть ды, зярдо тона прядызе кортамонзо, поладсь:

Монгак эзинь получа кавто иес мирдем пельде вейкеяк сёрма. Косо сон, мезе мартонзо — а содан... паряк, а живгак...

Паряк, моньгак кияк а жив...

Авась окойники тусь. Солдатось ильтизе васов, стрелочникень будканть томбалев. Сон эскелясь вакссонзо линиянть кувалма ды потмурасто чатьмонсь. Мейле лоткась ды кувать вансь мельганзо, зярс авась ззь ёмато валскень сэнь сувонтень. Солдатонтень марявсь: те авась эзь туе, сон кадовсь мартонзо, кадовсь козонь-бути ойменть потмаксос, кода каднови паро морось, конань морасы мазый вайгель...

Вирява. Перевод с эрзянского. Кузьма Абрамов. Солдат ды ава

Категория: Мои статьи | Добавил: tati (14.02.2010)
Просмотров: 405 | Рейтинг: 0.0/0 |
Всего комментариев: 0
Имя *:
Email *:
Код *:
...ERZINFORM
ОД СЁРМАДКСТ
[31.10.2010][Стихи]
Александр Арапов. З... (0)
[21.10.2010][Стихи]
Исланкин Юрий Иванов... (0)
[21.10.2010][Стихи]
Исланкин Юрий Иванов... (0)
[21.10.2010][Мои статьи]
Исланкин Юрий Иванов... (0)
[01.02.2010][Мои статьи]
Александр Маркович Д... (0)
ВЕШНЕК
ЛОПАНТЬ ЯЛГАНЗО
  • Официальный блог
  • Сообщество uCoz
  • FAQ по системе
  • Инструкции для uCoz

  • Copyright MyCorp © 2017
    Сделать бесплатный сайт с uCoz