ЭРЗИАНА эрзянский литературный сайт

ПРЯКСЛОПА
Категории раздела
Мои статьи [331]
Стихи [571]
КАВТО ВАЛСО
Статистика
Главная » Статьи » Мои статьи

Юлия Шведкова. НАРМУШКА.

НАРМУШКА

 

  Вай, кода виевстэ панжсь тедеде сиренесь! Весе велесь вайсесь тантей чинентень.

  Сырькаень шабрасо кудось чаволь, вальмалонзо кассь сиренень куракш. Та-кода сась тень мель молемс тов, пурнамс пусмо. Покш лиссь, мазый, мекев самсто весе седейсэнь кенярдынь. Шабрань кувака кудыкельксэнть вакска ютамсто пилезэнь апак учо каятотсь калцкаема. Мон сеске лоткинь ды варштынь верев. Васня мезеяк эзь неяво, ансяк кавто а покш вальмат, конатнестэ вейкесь ульнесь суликавтомо. Аламонь шка ютазь сулика марто вальмасонть рединь мазый нармушка. Сон чавсь сёлмосонзо рудазов суликантень, якавсь нерьсэнзэ верев-алов, прок вешнесь таркине, кува менемс оляв.

 Седеем апаркстомсь. Мезень кисэ пиштякась тапи рунгонзо, ёмавты виензэ, зярдо олячись истя маласо? Мон стинь пильгесур лангс ды карминь панемензэ пусмосон. Арсинь: кадсы, паряк те вальманть ды туи лиянтень. Ансяк стяко. Нармушкась седеяк тандадсь ды прась та-ков алов, ёмась.

  Кежев пиципалакстнэ невельдизь пильгень, ансяк мон эзинь маря сэредькс, талнозь учинь, кузеви-арась мазый нармушкась мекев.

  Окойники сон таго ливтясь. Таго теке вальмантень…

 Ней пиштякась эртневсь суликантень рунгосонзо. Вишка сельмсэнзэ тандадозь ваннось пертьпельга. Мон пелинь, сон истяк прядсазо эрямонзо оляв менема тарканть вакссо.

  Те шкастонть марявсь скалтнэнь парамост, ды монь мельс ледсь: ракшанть вастома, сырькаем кудосо арась. Кудов чиемстэ чарькодинь: кияк а лезды пиштякантень, бути сонсь лисема тарканть а мусы…

 Чопоньбелев таго молинь чаво пекстазь кудонтень. Вальмасонть кияк арасель.

  Пек покшоль мелем кемемс: нармушкась муизе оляв кинть, эзь пра вийтеме алов.

 Сеедьстэ ломантнеяк ильведить-манявить, яжить оймест ды рунгост, пря чавить ды а неить янксематнень чавочист. Ве ёндо ванозь, весемесь шождыне, ансяк эстензэ ломанентень кодаяк а муеви «лисема таркась».

  Кортыть, ломанесь весемеде превей Модамасторонть лангсо. Сестэ мекс сон сеедьстэ ёми, прок превтеме нармушка?


Категория: Мои статьи | Добавил: tati (06.06.2010)
Просмотров: 278 | Рейтинг: 0.0/0 |
Всего комментариев: 0
Имя *:
Email *:
Код *:
...ERZINFORM
ОД СЁРМАДКСТ
[31.10.2010][Стихи]
Александр Арапов. К... (0)
[24.01.2010][Мои статьи]
Художники в СССР. Из... (0)
[21.10.2010][Стихи]
Исланкин Юрий Иванов... (0)
[21.10.2010][Стихи]
Исланкин Юрий Иванов... (0)
[21.10.2010][Мои статьи]
Исланкин Юрий Иванов... (0)
ВЕШНЕК
ЛОПАНТЬ ЯЛГАНЗО
  • Официальный блог
  • Сообщество uCoz
  • FAQ по системе
  • Инструкции для uCoz

  • Copyright MyCorp © 2017
    Сделать бесплатный сайт с uCoz