ЭРЗИАНА эрзянский литературный сайт

ПРЯКСЛОПА
Категории раздела
Мои статьи [331]
Стихи [571]
КАВТО ВАЛСО
Статистика
Главная » Статьи » Мои статьи

Яков Кулдуркаев. ЯКСТЕРЕ ЦЕЦЯ. Ёвкс
         ЯКСТЕРЕ ЦЕЦЯ             
 
Ёвкс
 
Э й к а к ш т н э:
Бабай, озак минек ваксс,
Теевть аламос лиякс —
Чевтемть, велявтт сэтьме ковкс,
Ледстяк тенек вейке ёвкс:
Ёвтнемс валскес сатозо,
Чинзэ лисезь маштозо.
Сестэ минь тонь кадтадызь,
Палатадызь, шнатадызь.
Сестэ ансяк мадтяно,
Вестькак теть а пшкадтяно.
 
Б а б а с ь:
Мень мон ёвксонь ёвтницян,
Мазый валонь путницян?
Пачк мон весе сырединь,
Пингень эрязь ирединь.
Ташто курсякс мендявинь,
Сыре пангокс ландявинь.
Мезеяк эйсэнь арась:
Пеень певерсть, превень срадсть.
Течи прась остатка пеем,
Кона валаняль, прок эень…
Прась. Мон эземс путыя
Ды, превтеме, стувтыя.
Лиссь та-косто варясто
Састо, монь а марямсто,
Вейке чеерь — урыне,
Пулозо прок сурине,
Каподизе, палызе —
Седе курок салызе;
Чова пейсэ сускизе,
Каштом алов ускизе.
Пейтеме ней ков эцян?
Мень тенк ёвксонь ёвтницян?!
Кадык ёвты покштянк тенк,
Кона лазнось течи пенгть.
Сизесь пенгень таштамсто
Ды ней корны каштлангсо.
 
Э й к а к ш т н э:
Мень сон ёвксонь ёвтниця,
Мазы валсо кортниця?
Машты ансяк озномо,
Минекс-сюнокс козомо,
Минек лангсо нарьгамо
Ды пипкасо таргамо!
Ёвтака уш тонсь тенек:
Минь уш прянок онкстинек,
Онкстинек эсь келенек,
Пштилгавтынек пиленек,
Автневсть минек кургонок,
Сорныть учозь рунгонок.
Учотано ёвкскине,
Валскес а прядовкскине.
 
Б а б а с ь:
Ну эно кунсолодо,
Кундынк ёвксонть пулодо!
Кунсолодо пилесэ —
Ниленьгемень нилесэ.
 
 
I
Эрясть-аштесть атят-бабат кавонест. Эрясть пек кажовсто. Атясь яла кодыль карть. Кодыль эстест, кодыль миемс. А бабась ансяк штердиль яла ломаннень штердемат. Секеньсэ эрильтькак. Ульнесь сынст вейке нудей пильге сеинест. Омбоце — ботазь пуло ревинест. Колмоце — пуловтомо атякшкест ды нилеце — колмо толгасо саразкест. Арасельть а родняст, а раськест ды а эйкакшкест-какшкест. Сень кисэ пек янксекшнильть.
Озыльть яла кавонест каштланго чирес ды кукорь-кукорь авардильть. Кияк сынст а ловилинзе ломанькс, а путылинзе эрицякс.
Шабрат мик тенст сёвномсто яла мерильть: «Мень тынь эрицятадо! Арась тынк а «тетяй», а «авай» пшкадицянк. Ды нолдылизь кавонест эсь судост модас, туильть састынька кудов.
 
II
Весть совась тенст пурныця атя. Эвкстынзе сынст истяня кукорьгадозь аштемстэ ды риксэ авардемстэ. Кевкстинзе: «Мекс тынь истя авардтядо?» Сынь ёвтнизь тензэ эсь ризксэст: «Истя, истя, атине … Истя, сиянь сакалнэ. Улить минек кшинек-салонок, ламо минек ваканонок-чакшонок. Арасть эйкакшонок-какшонок…»
Мерсь атясь каршозост: — Вана мезень кисэ авардтядо-рангтадо! Мон путтадызь превс. Мутадо истят эйкакшт, конатнень лангс чиськак карми сельмень сявадозь ваномо, ды ковоськак карми тенст сюконякшномо. Кунсолодо, мезть тенк ней мерян мон: кизна, кода кармить кенереме инзейтне, моледе васоло вирев кстыень кочкамо, инзейде ярсамо. Ютадо кадозь паксява. Моледе сиянь лисьманть ваксс. Симеде ведтензэ. Тосто мутадо сень, мезе вешнетядо.
 
III
Удось атясь сынст кедьсэ лембе каштлангсо вейке ве. Валске стясь, сюконясь тенст ды мерсь: «Мон эрян тосо, Нужа велень ве песэ, цють чиремезь кудосо. Эрявиндерян тенк —садо монень». Ды тусь.
 
IV
Кизна сынь тейсть истя, кода тенст мерсь атясь. Кода кенерсть кстыйтне, инзейтне, мольсть вирев. Кочкасть кавто паргт кстыйть ды инзейть. Сась сынст симемаст, чентятотсть оймест. Мольсть сиянь лисьма лангс кельме ведте симеме.
Ашти лисьмась ськамонзо, пейди валдо сиясо, чуди кельме сельведьсэ. Кияк арась вакссонзо — а маласо, а косо. А ломань, а вайгель — а цих а цях.
Комасть атят-бабат лисьмантень, кармасть сиянь ведтенть симеме. Симсть седеест топодемс, чентязь оймест лоподемс. Стясть. Варштасть мекевланг. Аштить цёрыне ды тейтерне. Аштить кавонест. Ловить мазый кев пелькскеть.
Кармасть кевкстнемест:
— Костонтядо?
— Вармазейкань минь…
— Кие тынк тетянк? Кие тынк аванк?
— Тусто виресь минек тетянок, чаво паксясь минек тиринь аванок, лембе чивалдось минек оршицянок, киява ютыцят минек андыцянок.
Аварьгадсть атясь ды бабась сынст лангс ванозь. Аламос аштезь, кутмордызь. Саизь кудов. Андызь. Симдизь. Оршизь кода эряви. Макссть тенст лемть. Тейтернентень Пейдине, цёрынентень Кевганя. Кармасть эрямо.
Эзь марявгак, кона шкане сынь кассть. Теевсть истят: цёранть виде сэрензэ ды виензэ лангс ванозь, вирень тумотнень кеме карязост пурдавсть.
А тейтеренть лангс ванозь, алкукс, мик сонсензэ валдо чинтькак сельмензэ сявадсть ды ковоськак тензэ а весть, келя, сюконясь.
Кодак цёрась виензась, кармась чистэ важодеме: сокамо, изамо, тусто вирень керямо, домка леень пекстамо — сыре тетянзо-аванзо трямо-андомо.
Тейтересь а капшиль важодеме. Сон вечкиль ансяк парсте оршамо, эсь мазынзэ лангс ваномо, цеця юткова якамо ды чинь-чоп морамо. Аздан мезекскак кармась эсь прянзо ловомо. Тетянзо-аванзо лангс а варштыльгак.
 
V
Кодак тейтерентень топодсть кемзисемге ие, кармасть тензэ кудат якамо. Кодат ансяк эзть сакшно! Кодат ансяк сонензэ эзть кандтне казнеть! Якицятнень эйстэ вейкеяк цёра ды казнесткак мелезэнзэ эзть туе.
Састь тензэ кудат инязоронь цёрань пельде. Кандсть эрьва кодат казнеть. Пек тусь мелезэнзэ инязоронь цёрась. Ансяк эзть туе сонзэ мельс кандозь цецянзо.
Сюконясь тензэ Пейдине ды мерсь: «Кандт монень дюм раужо цеця, кона сёксень веде чопода, сестэ лисян экшезэть».
Тусь инязоронь цёрась прянь комавтозь ды ёмась. Ютась ве ие — сон арась. Ютась омбоце — сон эзь са мекев.
Пурнынзе инязорось весе масторонь од цёранзо ды мери тенст:
- Кие мусы ды идесы монь цёрам, сенень максса эсь мастором пелензэ. Кияк а сырк а тарк эсь таркастонзо. Весе ваныть эсь судост кувалма модас, весе чатьмонить. Колмоксть истя мерсь инязорось. Ялатеке кияк сур а сыргавты, кель а велявты, вал а ушоды. Мейле кевкстизе инязорось эсь маласо ломанензэ:
— Весе монь од ломанень тесэть?
Сонензэ серьгедсть:
— Арась тесэ ансяк тонь туво ваныцясь!
Инязорось мерсь:
— Тердинк сонзэяк. Паряк, сон идесамам?
 
VI
Муизь туво ваныцянть паксясто, туво ютксто. Цёрась удыль. Кучкоризь аламодо. Пувтызь. Мерсть тензэ, мейс терди ды мезе эряви инязоронтень. Стясь туво ваныцясь апак капша. Обедс ёзась прянзо. Чокшнес карсесь кавто пильгензэ. Мейле тусь.
Мольсь Адиян бабанень. Кармась кортамо: «Истя, истя, бабинем. Истя, седей сардынем! Монень эряви, келя, муемс инязоронть ёмазь цёранзо, коната тусь раужо цецянь вешнеме. Косто сонзэ муемс?»
Бабась вачкодинзе кавто кедензэ:
— Вай, цёрынем-эйдинем, мезе теть мик эряви! Инязоронь цёрась ней а курок муеви. Се раужо цецясь эстеньгак пек эряви. Сон сисем леень томбале, кемень пандонь тона ёно. Ансяк а муеви ды а саеви. Пек васоло цецясь ды раужо Гуень кедьсэ. Тонеть, нать, сави кодаяк лездамс вешнемс инязоронь цёранть, муемс раужо цецянть.
Таргась бабась эсь мештестэнзэ чеменев салмукс, максызе туво ваныцянтень ды мерсь:
— Тейть налонь нолдтнемка. Азё муик гуенть кавто вирень томбальде, сисем латко потмакссто. Нолдык те салмуксонть Гуенть кургс. Мейле ёвтан теть, мезе теемс мартонзо.
Тейсь туво ваныцясь налонь нолдтнемка. Тусь кавто пандо юткова, тусто вирень куншкава. Муизе Гуенть сисем латко потмакссто. Уды Гуесь. Колмоксть тапардазь цецянть перька. Ансяк маризе сыцянть чинензэ — стясь вирень сисем виде пичень сэрьсэ. Автизе кургонзо оромшка, анокстась нилемензэ.
Туво ваныцясь нолдызе чеменев салмуксонть видьстэ Гуенть автезь кургс. Повавсь Гуесь се вишка салмукссонть. Врадсь. Туво ваныцясь сезизе раужо цецянть. Кандызе бабанть туртов. А инязоронтень пачтизе ансяк цёранзо пря ловажанть, конань Гуесь кадызе.
 
VII
Саизе бабась раужо цецянть. Путызе вальма лангс ды мерсь туво ваныцянтень: «Те цецясь тейтеренть мельс а туи. Сонензэ эряви лия. Сон сонськак а соды, мезе тензэ эряви. Ансяк мон максан теть цеця, коната туи сонзэ мельс».
Мольсь бабась каштом икелев, таргась каштомсто тонол — раужо, кызыря, содов. Кандызе сонзэ туво ваныцянтень. «На вана саик тень ве кедезэть, а омбоцентень максса те якстере цецянть. Кандыть кавонест се бигельдиця тейтерентень. Васня невтик тензэ раужо тонолонть. Кода покордави, карми рангомо — максык сестэ те якстере цецянть. Мейле весе тевенк паркстомить, весе парсте теевить».
 
VIII
Мольсь туво ваныцясь тейтерентень. Несы — тейтересь яки, ванны эсь перьканзо, цимболды, пейди эсь мазынзэ лангс ванозь. Туво ваныцясь таргизе содов тонолонть. Венстизе сонзэ тейтерентень: «Вана теть раужо цеця кандынь».
Тейтересь кармась потамо. Потась, потась ды озавсь лаханьс, кона ульнесь пешксе тусто рудазов ведте. Кармась тейтересь авардеме сядонь кирда сельведьсэ.
Сестэ туво ваныцясь ёртызе тонолонть мейгенерть. Таргизе якстере цецянть ды венстизе тейтерентень. Тейтересь лоткась авардемеде. Стясь лаханьстэнть.
Кундась цецянть эйс. Кармась пейдеме. Мейле мольсь каштом икелев. Оршась лия панар. Лиссь тосто. Кутмордызе якстере цецянь кандыцянть. Палызе ды мерсь тензэ: «Те цецясь улезэ тонь, а тонсь ульть монь».
Сень каршо туво ваныцясь мерсь: «Цецясь улезэ тонь, тонсь жо ульть монь!» Истя ладявсть. Мейле лиссь се тейтересь сонзэ экшс. Теевсь паро никс, натой превейгак ды мазыйгак.
 
IX
А мезе тейсь бабась раужо цецянть марто? Сырькаесь, келя, пидизе сонзэ ды пидема ведьсэнть валнызе пужозь, сормсевезь чаманзо. Мезе кадовсь — симизе. Теевсь мазый тейтерькс, мейле лиссь мирденень. Пейдинень лелянзо — Кевганянь экшс. 
 
 Б и г е л ь д и ц я — кольниця.


Фокоси Алекс. Красные цветы
http://www.artlib.ru/index.php?id=16&idp=0&fp=2&uid=13227&iid=192391&idg=0&user_serie=0
 
Категория: Мои статьи | Добавил: tati (16.06.2010)
Просмотров: 565 | Рейтинг: 0.0/0 |
Всего комментариев: 0
Имя *:
Email *:
Код *:
...ERZINFORM
ОД СЁРМАДКСТ
[31.10.2010][Стихи]
Александр Арапов. К... (0)
[24.01.2010][Мои статьи]
Художники в СССР. Из... (0)
[21.10.2010][Стихи]
Исланкин Юрий Иванов... (0)
[21.10.2010][Стихи]
Исланкин Юрий Иванов... (0)
[21.10.2010][Мои статьи]
Исланкин Юрий Иванов... (0)
ВЕШНЕК
ЛОПАНТЬ ЯЛГАНЗО
  • Официальный блог
  • Сообщество uCoz
  • FAQ по системе
  • Инструкции для uCoz

  • Copyright MyCorp © 2017
    Сделать бесплатный сайт с uCoz