|
|
Иван Манди. Ветеран. Эрзянь кельс мадьяронь кельстэ ютавтызь Эрюш Вежай ды Эрюш Наталь
Иван Манди,
неень шкань мадьяронь сёрмадей
Ветеран
Сон сыргойсь кенкшентень дилиньдемадо. Чи ютконь удомазо лыйк тейсь.
Тантеель, сэтьмель ярсамодо мейлень сутямкшномась… Ней сон истяко
мадезель удома таркасонзо , теке уйсь те пилень сези гайтенть пачк. Сон
а стиль. А стияк! Шаштсь диванонть чирес.
- Дирьнеде! Раздеде
баяганть зяро ули меленк! - Маряви, лоткасть? Арась! Седеяк азаргодозь
лепштнесть кенкш баягинень пупорьканть.
Жамбоки Янош лиссь
авол-увол, превензэ велясть, сельмсэнзэ чоподаль. Панжтызе кенкшенть.
Сынь аволь совастькак, тыцмаезь эцезь-эцесть. Зярыя цёрынеть ды
тейтернеть. Вейке цёрабаесь лоштявсь диванонть лангс. Кавто
тейтерькатне пильгеде ноцковтызь сонзэ тосто.
- Ветеранонь содавтомат-варштамот!!
- А чарькодян… Мезть?
- Минь вешнетяно-пурнатано ветерант. Истятт.., содатадо…, сыреть… революциянь шкань…
- Мекс аволь маркат, някат-налкшкеть, ламбаськень тапаркскеть?
- Те мезде Тынь кортатадо?
- Койсэм, тон парсте маримик: маркат, налкшкеть, тапаркскеть…
- Минек ули максонь тевенек, заданиянок!
Те вайгелесь! Косто саевсь истямо коське, прянь вере невтиця
кортавтось? Сон ваннынзе чамаст. Теке капшт-капшт салынзе неть
чачотнень та-кодамо кинигань лопасто.
Сынь вансть лангозонзо,
кода ваныть кезэрень калмосто таргазь муевксэнь лангс. Састь вана
тензэ. Токшить эйсэнзэ пелезь-пелезь… Кадови, эли челькекс велявты?
Косто а косто ужосто марявсь ве тейтерненть вайгелезэ:
- Миненек максызь Сахор куринканть.
- Мейсь тенк максызь Сахор куринканть? – Мик жаль марявсь те
седикелень, седейсэнзэ аштиця ульцясь. Куринкась, конань кис ней
валгак, вант, кияк а каи …
- Кода меремс…Теня… Тев пелькстамосо-соревнованиясо улемс тенек эряви. Кона школась седе ламо ветерант…
…пурны-муи! Паро, теде мон маринь-теинь. Меремс, те моли школатнень юткова тень кис истямо пелькстамо. Монень кие кучидизь?
- Жока тонавтыцянок.
- Классонь ветицянк?
- Истя, классонь ветицянок.
- Сонсь эзь са мартонк...
- Эзь. Сонсь эзь.
- Шумбракстнемам Жока тонавтыцянонк. Илинк стувто ёвтамонзо. Мезть таго сон мерекшнесь тенк?
Чатьмонема. Мейле теке та-кие ловнозь ловнозевсь конёв панкссто:
- Жамбоки Янош, Имре Мезень лемсэ видекурось-проспектэсь, комсь
кавтовоце кудось, нилеце кудо кирдаксось-этажось, нилеце
кудопельксэсь-квартирась. Революциянь кис сыре туриця.-
Та-кинь лома лемесь, та-кинь ломат кудотешкстнэ...
Виде-паро! Истяня асодавиксстэ марявсь лемеськак,
кудотешксэсь-адресэськак. Кие соды! Мекс ва эзь ульнекшне Янош Жамбоки
испаниянь раське потсонь туремасонть-порксамосонть? Оляксчинть кис
торпингесэнть? Раське потсонь туремасонть сынь изнязельть, а вана Эрбо
ошонть маласо - нонат порксакшнозелть. (- Сынь…- Те кить? –
«сыньтне»..?)
- «Кедь лапушкань акирдевемат…» Мезе истямось теевсь кедьлапушкатнень марто?
Цёрынесь баксорясь-котьмась тев стуворонь лангсольть конёвтнесэ. Нерькстась эйстэст вейкентень.
- Инеськеть! Вана тесэ!
-«Кедь лапушкань акирдевемат…» Мекс кедь лапушкатне акирдемасост?
Ноцордозь ноцордызе цёрканть.
- Мезть тесэ сокарят?!
Визьделгадонь пеедемань кондямо...
- Истяк варштынь, неть… - цёрынесь невтсь конёвтнэнь лангс. – Тынь вечктядо сёрмадомо?
- Тонавтыцянк теде мезтькак эзь ёвтне?
- Эзь. Теде эзь ёвтне. Ансяк седе, кода…
- …мон ёртнилинь бомбат…ушмом марто печтнилинь пандо карязт…апак учо..-
Лепиякадсь, таргизе оймензэ. Варштазевсь од ломантнень лангс. Бошан
пеке цёркась боярокс озадоль-мадезель чевте озамосонть! Кирвастизе тев
стуворонть лангсто апак мере саезь сигаранть…
Кежень апак кирдевть, ноцковтызе таргамканть турвастонзо:
- Озамо таркась максомаль киненьгак!
- Янош лелянтень?!
- Аволь Янош лелянтень, неть тейтернетненень!
Комавтовтызе човинька тейтерьканть озамонтень. Тона сеск ёмазь ёмась.
Ваязь ваясь домка озамонть потс. Жамбоки яла верьга вайгельть пижнесь
цёрканть лангс:
- Мезе, зярдояк течимс эзить марсе теде?!
Лоткась пижнемеде.
- "Мезекс мон истя пизякадынь? Ков истяня маштови?" -
Апак учо сон озавсь видьстэ киякс кумбонть лангс. Туркань ломанень койсэ. Кумбонть куншкас.
- Ламо ветерант те шкас муиде?
- Кавто. Ды вейкесь эйстэст кулозель.
- Секскак сонзэ а ловомаяк.
- Ловома. Полазо ёвтнесь…
- Седе виде, кадозькезэ.
- Истя, виде. Кадозькезэ. Довазо ёвтнесь, кода сон мирдензэ марто
турьсь-воёвась, заводсто кекшнесть витнемапелькст-мезть, идекшнесть пек
эрявикст витнемапелькст.
- Монень кодаяк а савкшны шнамс прям истямо тевсэ.
- Тынь явшиксэлиде тердема конёвлопат-листовкат?
- Мон эзинь явшекшнэ конёв лопат. Мон мезтькак эзинь явшекшнэ.
Улиндеряй меленк пек содамс, мон киньгак эзинь кекшнеяк, эйсэньгак кияк
эзь кекшнекшне.
Кортамсто сон ванныксэль мельгаст.
Тейтерькась нурьгавтынзе пильгензэ чевтьэземстэнть. Конилканзо
васодезь, кеместэ педявтозь вейс. Ве тейтерькась недизе кедь лапушканзо
пукшонзо алов. Ашти сэтьместэ, апак айгше. Мусь эстензэ тарка. Кавто
тейтернетне полавтнесть вейке-вейкень марто эсь свитрынест. Лиясь
порьсь ламбамо сюкоркадо. Шабрацек озадоль ялгазо кардызе: - Иля
паморьде…
- Кандан тенст мень а мень симемка. Я-а.., паро, ансяк
мезьде? "Трауби" веднеде, коладо, тоникте…Эряви мучкамс мезе а мезе. Ды
мон мезе, превстэ лисинь? Лия тевем кодаткак арасть? Вана нетнень
каванясынь? Неть эвтицятнень-пижницятнень, конат апак кевкстне эцесть
кудозом?
- Ветеранонь вешницят! Шукшпрява лытыцят! Виде! Нолго тулот! Прянь шныцят, шлявксонь-сускомонь вешицят!
- Нейке туян Чорба ялганстэнь. Оймсян-удан диваност лангсо. Явавтса
удомам кедьсэст. Вырновтса прястом-удемстэм весементь, весемензэ…
Сон теке лома кудонь паникудос салава совась, истямо лавшочи стардызе. Стуворнэнть лангсоль пельс симезь вина сулика.
- Дебре ошонь «Харшлевеле» винась… Пельс ламбамо...
Чаво вина суликатнеде паникудосонть - эрьва кува! Ламо пельс чамдозьтнедеяк...
Симема ведне марто вейкеяк арась. А коладо, а "трауби" веднеде, а тоникте…
- Мезть ней? Паряк, вана те пельс чаво «Дебреинседенть» кандома? Теньсэ каваняма?
Човоргадозь, варштась удалов.
- Франко генералось тапизе революциянть кис кепсевеманть. Мартонзо
лияяк генерал ульнесь. Сынст лемест свал лецтневильть вейсэ, сави
меремс, васенце шкатнестэ. Кода тензэ мерильть?? А ледстявияк тень
лемезэ, идемевсесь тоначив саевлизе! Сынст превтеме, орькс кежесь…
Икельцькудос велявтомсто атясь мерькась сур песэнзэ суликань потомксонть.
Тев стуворонть экшсэ озадо аштиця цёрабаесь таго таргась. Арсезевть чамасо нолднесь сигарань качамонть.
- Тынь эзиде ветя эрьвачинь тешкст-сёрмадовкст? Сеть шкатнеде?
- Кодат тешкст? – Атясь яла пуворькшнесь сур прясонзо потомкскенть. – Кодат сёрмадовкст ды кодамо шкатнеде?
Тень пингстэ сонсь сэрьс ванныксэлизе тейтерканть. Чувтомозь чама.
Чополт мериця черть. Валдо-якстерьть оршамот. Мик аволь
валдо-якстерьтькак, истямот… Ялатеке пек молить тензэ. Кода мелезэ
налкстась тесэ... Неяви, а парсте чарькодияк, кода понгсь тезэнь.
Жамбоки аволь истяко ваннось. Сельмензэяк тейтеренть лангсто а
саевильть. Сон марясь истямо ёжо, истямо талнома, кодамот марсесь,
зярдо эрямосонзо весть васенцеде кортазевсь тейтерь марто «Кинжи»
кинотеатрасонть.
- Кие тонь тетят?
Тейтересь, мерят, мезеяк эзь маряяк. Нузяксто, мелень трокст, велявтызе прянзо сонзэ ёнов.
- Кие тетят? А ёвтат, косо сон важоди?
Васолдонь, а чарькодиця варштавкс... Тейтернесь эль неявиксстэ
комавтызе прянзо. Туи ва... Нейке сти ды туи... Арась. Апак учо тона
правтсь вал:
- Нарыця. Прянь-сакалонь нарыця.
- Прянь нарыця! – Цёрынень згилиця вайгель.- Нейгак яла вечксы чапамодо копордамканть?
Тейтересь казизе цёрыненть лембе мизолкссо. Ды истямо чевтине, эльниця вайгельнесэ:
- Азё тон эьдень пуло алов, Тихани!
- Тон мейсь истя, мазыйка?
Жамбокинь сельмензэ икельде та-кода сеск ёматотсь лецтявозь тейтересь,
ёматотсь «Кинжи» кинотеатрась, весе лецтнематне ёматотсть…
Сон сэрьс венстизе рунгонзо кумбонь чевтеванть. Та-кие комась прязонзо вельксэс:
- Янош леляй! Те мень кинигат нупалень тона ужосонть?
Сон кепсть тейсь.
- Се монь покш ёвтамом. Сась мастор томбальде!
Истя каштансто мерьсь: - «Сась мастор томбальде!…»
Ревекс тормодевсть од ломантне кинигатнень перька. Теке те шкас эзь
содаяк кияк вейкесь вейкенть. Апак учо васодевсть, вейс пурнавсть...
Цёрынесь варштась удалов.
- Янош леляй, сынст мезе, нолдызьгак масторонок томбале?
- Аволь весемезэ истя...
- Те кириллица?
- Истя, те кириллица.
- Лисни, те…
- Болгаронь кельсэ... Ёвтамом нолдазь болгаронь кельсэ.
Сельмень тетьксезь варштасть Жамбокинь лангс. Истя вансть, теке ансяк тумо прясто лондадсть.
Совамо нупальстэнть марявсть та-кодат якамот... Човорявозь эскелькст... Кие-кие лиссь. Паряк, венелев якамо тарканть вешни.
- А невтьса тензэ. А невтьса! Вешника! Вешник!
Те ветеранонть пейдемказо! Сон мадсь пекензэ лангс. Вадяшась, кавшакавтнесь сурпрясо кумбо суринень артовкстнэнь.
- Янош леляй, зяроксть тон кепсесак рунгот кедь лангсот кияксстонть?
Муст-муст пеедемат...
Ве вайгель:
- Колочаи! Кирдик, сускик келеть!
Жамбоки озась. Кутмордынзе конилканзо.
- Мон а вийсэян.
Ве тейтернесь сэрьс ваннызе: - Коське! Кодамо коськана рунгозо!
- Видеяк. Сталмось эйсэм пелевень чопачань...
- Мейсь истя, Янош леляй!
Янош лелясь уш вальманть икелель. Пезнавтынзе сельмензэ ушов.
- «Сталмом чопачань…» Мейсь истя меринь? Тандавтыксэлинь?
Абунгавтыксэлинь? Улевельгак истямо мелем, ялатеке а ёнсто те лиссь…
- Оно тосо, зярдо-бути, аштесть микшнема лавкинеть...
- Лавкинеть? Косо?
Сёрмав панарсо тейтернесь венемтизе рунгонзо вальманть ёнов.
- А мешан?
- Мезеяк, арась…Истя вана ульнесь, пецек-пецек аштесть…микшнема лавкатне. Таркантькак лемезэ ульнесь – Микшнема тарка.
- А монень тетям ёвтнесь – те тарканть лемезэ Теле ки.
- Эно… Нама, Теле ки. А вана сыре микшницятне мерить тензэ Микшнема тарка. Сынст туртов те таркась кадовськак кавто лемсэ...
Сёрмав панарнэсэ тейтерьнесь ды Янош Жамбоки. Те валдо, мазый
чаминезэнть ванозь, сельмензэяк оймсесть. Теке сельмень оймсема тарка.
- Мезть тосо микшныльть-рамсильть?
- Эрьва мезе. Цёрань туртовгак, аваломанень туртовгак ламоль мезе... А
мезть кортамскак... Пластинкат, кинигат, керезть, очкт, коникть,
лампат…Седе тов мон теде кортамояк а карман... Тейтерь-мазыйка! Арась
меленк рамамс коштвенч-самолёт?
- Коштвенч?
- Ней эрьва кудораськесэнть коштвенчесь пек эрявикс! Кадык аволь пек одгак... Косто рамамс сонзэ? Ды Микшнема таркасо!
- Коштвенч! Коштвенч!...
Тейтернесь апак учо кашкамсь. Токшезевсь Жамбокинь кедьс.
- Мезе мейле лавкатнень марто..? Мезе мартост теевсь?
- Тюшумбар весе тусть.... Ёмасть... Лавкатнеяк, микшницятнеяк...
- Мекс истя?
- Мекс..? Мекс..?
Ней сынь весе аштесть вальманть икеле. Ванность чаво тарканть.
- Ды менть тон Янош лелядонть! Педить теке педлей эзэнзэ!
Коськана чама цёрынесь тёхмадизе тейтерненть. Чатьмонезь варштась Жамбокинь чамас. Кевкстизе:
- Тынь ульниде кодамояк пекстамо таркасо, меремс, лагерьсэ?
- Пекстамо таркасо?... Мень лагерьсэ?
- Истямо…Кода…Козонь ломанть пекстнилть…
- Пленноень лагерьсэ? Концлагерьсэ?
Кувака кашкамо...
Сон косто а косто, васолдо, маризе се седеень кери, оймень кельмевти вайгеленть... Превензэ човаргадсть...
- Ков сынь арсить панемем?... Мень лагерьс? Эрявсь тень те лагересь! Ансяк лагерь
тень ней эзь сатне! Кунсолодо! Мезе истямо тосо учи эйсэм?!
Цёрабаесь абунгадозь, састыне, кармась шаштомо кенкшенть пелев...
- Ванан, покштяй, туема тенек... Арасель меленек мешамс. Виде-паро…
- Тынь а мешатадояк! Аштеде! Кортнетяно аламнеде… Басятано!
Сынь дуборсо каявсть лисема ёнов...
Тосто, кудыкельксэнть потмакссто, марявсь:
- Паряк, пароль Ленин марто содавиксэкс улемс??!...
Жамбоки варштась чопода, а ванькс, раздезь-лазнотозь совамо кустима
варянть потмаксос. Нежедсь кустима кундамотнес, трокскаст
мендявсь-чиремсь ды рангстась:
- Ленин марто мон зярдояк эзилинь ульне содавиксэкс!!!...
Эрзянь кельс ютавтызь
Эрюшонь Наталь
Эрюшонь Вежай Санкт-Петербург – Полярной 2004 ие, чадыков.
|
| Категория: Мои статьи | Добавил: tati (07.01.2010)
|
| Просмотров: 972
| Рейтинг: 0.0/0 |
|
|
|
