ЭРЗИАНА эрзянский литературный сайт

ПРЯКСЛОПА
Категории раздела
Мои статьи [336]
Стихи [571]
КАВТО ВАЛСО
Статистика
Главная » Статьи » Мои статьи

Ишуткин Николай Иванович

                                                     Валморот

Эрзянь валонть мазычисэ

Неень шкань эрзянь литературасонть сехте вадря сёрмадыцятнестэ — «Чилисема» журналонь прявтредакторось, Россиянь Сёрмадеень вейсэндявксонь членэсь, Мордовия Республикань культурань зас­луженной роботникесь Николай Иванович Ишут­кин. Сон сёрмады поэзиясояк, прозасояк. Течис нолдась сисем книгат.

Чачсь Николай Иванович 1954-це иень панжиковонь 28-це чистэ Покш Березникбуень Симкина велесэ. Авазо важодсь колхозсо, тетязо тонавтсь школасо эйкакшт. Тесэнь ёнксось теке ёвксонь мастор, конань мазычись вишка пингстэ уш совась Ишуткин Колянь седейс. Кадовсть эйсэнзэ аванзо чевте моротне, телень кувака чокшнэтнестэ кезэрь пингеде, Виряватнеде-Ведяватнеде сырькаензэ ёвтнематне весе теде поэтэсь ледстни ней кода тантей ондо. Тосо чачсть-вельместь васенце моронзо.

Васенце стихотворениянзо лиссть «Сятко» журналсо 1973-це иестэ. Те — «Од пора» ды «Килейне». Сестэ саезь Н. Ишуткинэнь лемезэ секе тев кармась вастневеме республикань газетатнесэ ды журналтнэсэ. Вейсэнь мелесь истямоль: эрзянь литературас сась лиянь ёнов а молиця, эсь вайгель марто поэт.

1987-це иестэ сехте вадря стихензэ максынзе вейсэнь пусмос. Сон лиссь «Маней васолкст» лементь ало. Кавто иень ютазь нолдась эсензэ пусмояк — «Валскень теште». Сон Россиядо, чачома модадо, покштятнень-сырькайтнень ды тетятнень-аватнень тевест поладомадо, ломанькс улемадо («Пингень сэдь», «Пизёлтнэ таго кенерсть...», «Сюконямо», «Пакся», «Дова бабат», «Раужо килейть», «Атя», «Седей мар­то кортамо», «Зяро часиянок минек», «Мон велень цёра», «Валдо онт», «Чаво кудо», «Кадозь умарьпире» ды лият). Теде башка пусмосонть аволь аламо стихть васоло эйкакшпингенть марто вастневематнеде, ошсто велев велявтнематнеде, чачома ёнксонь мазычитне-де, вечкемань талновтыця ёжомарямодонть. Весе теде ёвтнемстэ поэтэсь мукшны эрзянь  кельстэ сехте мазыи, седеень китордовтыця валт. Вана ансяк вейке саевкс:

Весь копачизе пертьпельксэнть,

Тешттне певерсть домка лейс.

Сутямсть чувттнэ веденть вельксэс,

Пильгест кекшизь чейтнень эйс.

Энгамсь, матедевсь прок вармась,

Косо-бути уды чись.

Од ковось жо, теке тарваз,

Пеленть-пултонть экшстэ лиссь.

(«Ве»)

Кавксо валрисьметь ансяк, а зяро мазый муевкст, конат аволь веяк прок невтить — отьма-космос: «весь копачизе», «тешттне пе­версть», «чувттнэ... пильгест кекшизь», «вар­мась матедевсь», «од ковось, теке тарваз». Те вадрясто невти: Н. Ишуткин машты валонть танстензэ марямо, косо эряви, ёвтнема лувонть полавтомояк — Пазось а эрьвань казекшни истямо ёрокчисэ. Тенень седеяк кемезеват пусмосонть нурька стихензэ ловномсто. Те — кодамояк вастомадо, умонь тевде апак учонь ледстявкс, меньгак арсема, килангонь ледстявкс — кивчкадсь зярдо-бути сельме икельга ды вана ки соды мекс сась мельс. Ледстявксось те нурька, теке чаповкс, поэтэнтень — питней, ды сон капши явомонзо лия марто: паряк, сынсткак токасынзе седеест:

Сась паксясто авам сизезь,

Озась столенть экшс.

Ванан: кедензэ лангс чизэ

Викшнесь сырнень тешкст.

Неке тематнень, ансяк, нама, художествань-эстетикань седеяк покш сэрейчисэ, Н. Ишуткин кепеди стихень лия пусмосонзояк: «Тештень мастор» (1994), «Пейзаж души», конасонть сон невтизе прянзо рузонь кельсэ паро сёрмадыцякскак (1998). Теке марто поэтэсь яволявтсь прядонзо вадря юмористэкс-сатирикекс. Теде кортыть «Тештень мастор» пусмосонть «Варяв пачалксеть» пародиятне ды пейдевтиця ёвтнемань «Вармань кандовкст» пусмось (2004). Н. Ишут­кин теде башка прянзо невтизе кода эйкакшонь туртов паро сёрмадыця. 2007 иестэ лиссть кавто книганзо «Пейделькань кужине» ды «Идем ракшань мастор» (эрзянь, рузонь ды мокшонь кель­сэ). Ды теке шкане Н. Ишуткин кенери топавтомо вейсэнь ламо тевть, нолды эрзянь эйкакшонь ды од ломанень туртов журнал. Вадря журнал, кона иестэ иес сыремти-кирвазти эрзянь литературанть туртов яла од ды од тештинеть — сёрмадыцят...

Василий ДЁМИН,

филологиянь доктор, профессор

Категория: Мои статьи | Добавил: tati (15.01.2010)
Просмотров: 1806 | Рейтинг: 5.0/1 |
Всего комментариев: 0
Имя *:
Email *:
Код *:
...ERZINFORM
ОД СЁРМАДКСТ
[19.01.2010][Стихи]
Александр Арапов. С... (1)
[21.10.2010][Стихи]
Исланкин Юрий Иванов... (0)
[24.01.2010][Мои статьи]
Регина БУДАРИНА. Пут... (0)
[24.01.2010][Мои статьи]
Художники в СССР. Из... (0)
[21.10.2010][Стихи]
Исланкин Юрий Иванов... (0)
ВЕШНЕК
ЛОПАНТЬ ЯЛГАНЗО
  • Официальный блог
  • Сообщество uCoz
  • FAQ по системе
  • Инструкции для uCoz

  • Copyright MyCorp © 2024
    Сделать бесплатный сайт с uCoz