ЭРЗИАНА эрзянский литературный сайт

ПРЯКСЛОПА
Категории раздела
Мои статьи [331]
Стихи [571]
КАВТО ВАЛСО
Статистика
Главная » Статьи » Мои статьи

Дмитрий Тимофеевич Надькин (28.05.1934 - 07.1992)

МЕЛЕЗЭНЬ      КАДОВСЬ     ВАЛДО

               Л    Е  Д С  Т  Н  Е   М  А  К  С

                                                                         Валморот

Эрзянь кельсодый — филологиянь док­тор, профессор — покш поэт, ёроков тонавтыця, раськензэ кис седейшкава мелявтыця, вадрядояк вадря ломань... Те весе вечкевикс тонавтыцядон — Дмит­рий Тимофеевич Надькиндэ. Стака ёвтамс, кодамо ёнксось эйсэнзэ седе виевель. Монень маряви, те ломанесь эрьва ёндо пароль-мазыель. Панжиковонь 28-це чистэ тензэ топодевельть 75 иеть. Ансяк сон умок уш арась ют-ксонок. Эрямозо цяторсо палыця штатолокс палсь, солазь солась. Тень коряс сави ансяк янксемс-ризнэмс. Улиндеряволь лиякс, те шкас зяро паро тевть топавтоволь эр-зятнень лезэс, зяро од панжовкст наукасо теевель, зяро стихть сёрмадоволь-ладсевель! Арась, улема, Инешкипазонтеньгак вадрят эрявить, сехте вадрят...

Монь мельс Дмитрий Тимофеевич кадовсь валдодояк валдо ледстнемакс. М.Е. Евсевьев лемсэ пединститутонь фи­лологиянь факультетсэ тонавтнемстэнь сон ульнесь тиринсенть вечкеме тонавтыцям, превспутыцям. Те сонзэ стихтне, конатнень лекциясто сеедьстэ лов-нось сонсь, потмаксос токизь седеем ды сыремтизь сёрмадомань мелем, те сонзэ вельде мария эрзянь валонть мазычинзэ-танстензэ. Сонзэ вайгельсэ ёвтазь эрзянь валтнэ марявсть тень лавсень морокс, гайтевстэ чольдердиця баягинекс. «Кустемат» стихень пусмонзо, конась ансяк лисекшнесь печатьстэ, педе-пес тонавтнекшния.

Тонавтыцям нейгак ашти сельмень икеле: аволь пек сэрей, вечкевикс чачо, шержесэ токазь черензэ валанясто судрязь; оршамонзо, кода свал, ванькст, тюсонь коряс малавикст, ладицят; яки апак капша; студенттнэнь мартояк шумбракстни сюконязь ды мизолдозь, мерят, эрьвась кие соды кодашка мельспаро тензэ канды. Видькстан, минек курсонь студенткатне вейкень пес алкуксонь вечкемасо вечкилизь.

Лекциязонзо-семинарозонзо яксилинек покш мельсэ. Содылинек: эйсэст а тошнакадат, а нувсезеват. Дмитрий Тимофеевич маштсь нурькинестэ ды чарькодевиксстэ ёвтнеме, мартонзо кортамо тердеме, пелькстамонь сыремтеме. Мартонок мельспаросо басясь перьканок эрямодонтькак, вечкемадояк, кардась эйсэнек берянь тевде-зыяндо. Мель явсь эрьвантень. Фатиль: «ве ёнов таргинек» — пейдезевиль ансяк.

Аудиторияс совиль — сеске општ теевиль. Минь виздилинек пингстэнзэ щалтонь кепсеме, семинарозонзо апак анокста сакшномо. Зачётсо эли экзаменсэ кувать эйсэнек а майсевтиль. Максозь кевкстематнень коряс а кевкстниль. Максыль понгиндерявлидеяк, улиндерявольтькак валтнэнь кондят зярыя ды кармав-тылинзеть пельксэнь-пелькс явномост. Евтнесыть видестэ, лият а кевкстнильгак.

А стувтови тень Дмитрий Тимофеевич марто Чувашиянь Сигачи велесэ диалектологиянь практиканокак. Тосо минь, студенттнэ, ды сон теевкшнинек седеяк малавиксэкс. Эрзянь те веленть нучк-пачк мартонзо якинек. Ловт, эрьва кудос совсинек, сыре ломантнень кортамост кунсолынек-сёрмалинек. Чокшнэ таго вейсэлинек. Ярсамодо мейле пурнавилинек перьканзо, ды тесэ ушодовиль... концерт. Тонавтыцянок пек парсте седясь гитарасо ды седеень токиця ваигельсэ морась эрзянь ды рузонь морот, пейдевтиця морынеть. Меельцетнеде эрьвадонть ладсекшнесь, ды минь эзинек кежиявтне: пейдемась чевтедеяк чевтель, паронь кис ёвтазель. Эряви меремс, пельдензэ ламо од морот тонавтнекшнинек, ан­сяк сехте пек тенек вечкевкшнэсть «Незабудка», «Литова» ды «Эй пачалго». Мельганзо мурнозь, весе репертуаронзо курок тонавтнинек ды мей­ле Сигачинь эрзятненень вейсэнь концерт невтинек. Мельспаронок а онкставишкаль.

...Ламо ведь чудесь теде мейле ды, несак, а стувтовить тень се шкань тевтне. Улема, секс, мекс сестэ пек одолинь, уцяскаволинь, мекс перькан ульнесть ламо паро ломанть, конатнень эйстэ вейкесь — Дмитрий Тимофеевич Надькин. Се­стэ, эрямстонзо, вадрячинзэ кис эзинь ёвтакшно тензэ сюкпря. Ней лемензэ кундсеса сеедьстэ ды кортан: «Тосо, тоначисэ, Пазось максозо тензэ паро тарка».

Татьяна РАЗГУЛЯЕВА

Категория: Мои статьи | Добавил: tati (12.01.2010)
Просмотров: 869 | Рейтинг: 0.0/0 |
Всего комментариев: 0
Имя *:
Email *:
Код *:
...ERZINFORM
ОД СЁРМАДКСТ
[31.10.2010][Стихи]
Александр Арапов. К... (0)
[24.01.2010][Мои статьи]
Художники в СССР. Из... (0)
[21.10.2010][Стихи]
Исланкин Юрий Иванов... (0)
[21.10.2010][Стихи]
Исланкин Юрий Иванов... (0)
[21.10.2010][Мои статьи]
Исланкин Юрий Иванов... (0)
ВЕШНЕК
ЛОПАНТЬ ЯЛГАНЗО
  • Официальный блог
  • Сообщество uCoz
  • FAQ по системе
  • Инструкции для uCoz

  • Copyright MyCorp © 2017
    Сделать бесплатный сайт с uCoz