Кезэрень вирь  

Кияк а соды зяро те кезэрень пиче вирентень иеть…Сон кайсь ды кайсь ламо пингень перть. Те ульнесь вейке покш, виев, сэрей, тусто вирь. Ансяк састь шкат, зярдо зыянов ломантне кармасть керямо, саламо, яжамо эйсэнзэ. Тень лангс апак вано виресь виензась ды виензась.

 Весе марто эрясь пиче виресь ялгаксчисэ. Вармась, виренть ялгась,  лездыль: ёртниль яла сонзо видстензэ модамасторонть келесь. Ведесь валнылинзе видстнень, максыль симемапель пичетненень ды вишка пичинетненень … Чипаесь (оштё вейке пиче виренть ялгазо ды, нама, сехте малавикс) эждиль неть видметнесэ. Пичетне свал ёртнилизь кедест верев, Чипаентень. Тень кис сон максыль певтеме эрямо вийть. Од пичетне свал вейсэндякшность сыре пичетне марто. Чипаесь невтиль скось валдо ки. Сонзэ вельде пурнавильть весе вейсды виресь зярдояк эзь явновт. Вадрят пичетне: сэрейть, мазыйть, кеметь…

Састь зыянов шкат… Пиче виресь ушодсь ламо вийсэ тюреме апаро ломантнень марто: пекстниль эйсэст вирь потс, косто киненьгак а муевельть яла. Тюреманть марто виресь тунь стувтызе Чипай ялганзо, эзь энялдо сонензэ мелявтома марто. Вармась ды Ведесь тескельть, маласо, Чипаесь верель - шка эзь муеве мекс-бути сонензэ, яла моданть тевть тейнесь. Арсесь неть тевтнеде мельга Чипаентень энялдомс. Тевть… Тевть… Стувтовсь…

Вармась истяжо ёртниль видстнень модамасторонть ланга, васолга ёртниль,  Ведесь симдиль. Касыльть пичетне. Вана ансяк Чипаенть валдовтомо Вармань васолга ёртовкс пичетне эзть мукшно ки одов покш вирентень. Истя човорявильть лия чувтнэнь марто, касыльть човор вирть.

Пек ламо иеть човорявсть пичетне лия чувтонь виртнесэ. Карамасть стувтомо кить сынь те моданть лангсо. Лия виренть чувтнэ путсь та-кодамо лем пичетненень ды эсест лемеськак стувтовсь. Пичетень вельде ламо вирть тустолгадсть…

Берянь те тевесь. Берянь пичетненень. Ламот совасть лия вирьс. Ансяк пичень тюсось ды пичень оймесь маряви…

Эзь ортневе весе виресь, пек корёнонзо кеместэ модантень совазь.

Вирентень ломантне нейгак якить, седее ламо берянь мель марто, вадря мартояк аволь аламо. Раужо ломантне веси виртнень икеле шныть пиче вирьсэнть, келя, кодамо мазый. Наряжить эйсэнзэ мень-бути лия масторонь мазынькайсэ, морсить морот. Ансяк салава, удалга керить эйсэнзэ, шешкить сонзэ мазычинть. Истя вирентень аволь кувать эрямс. Превей валдо пичетне чарькодизь тень, кармасть Чипаентень одов энялдомо. Чипаесь пок кеж кирди… Аламо пичт ёнонзо тарадт кепсить, стувтызь Чипаень максовкс эсест Пиче лемест. Ялатеке,вансы, пичетне бажить сонзэ мекев велявтомс, одов вачамс сонзэ чанстенть. Истя аламонь-аламонь карми касомо виресь, виевгадомо. 

Ансяк авлизь керя кежей ойме ломатне неть валдо чувтнэнь, ансяк авлизь керя…

Сантяй, 2009 ие, ацамковонь 12 чи