ЭРЗИАНА эрзянский литературный сайт

ПРЯКСЛОПА
Категории раздела
Мои статьи [331]
Стихи [571]
КАВТО ВАЛСО
Статистика
Главная » Статьи » Мои статьи

Александр Тикшайкин. ПАРО ЛОМАНЬ. Ёвтнема

ПАРО ЛОМАНЬ

 Ёвтнема


     Тпр-р-р-ру-у-у! — марявсь ушосто казямо вайгель. — Кома, мезть кургот автнят?! Содык ды ливть мезеяк, илязо кельме, а неят — сорны!

Маря варштась икеле вальмава — лишменть лангсо пансттнэ-ашкотне одт-парт.

Вай, Нишкепаз, — сорнозевсть аванть кедензэ, — некак, покш ломань сась!

Кхе-кхе! — марявсть кудыкельде гайтев козкстнемат, прок азоро совась.

Ки-и-ирк, ки-и-ирк! — кортазевсть пельскаладо лазтнэ. Ур-р-рк! — панжтотсь кудонь кенкшесь. Поровтонть трокс эскельдясь кувака шубасо цёра. Ревешка понав шапказо сельмечирькезэнзэ нолдазь.

     Ютак, ютак, Иван Хви... Хвилипыч, — сеске содызе Маря совицянть. Те ульнесь Филянь Ваня, вирьваныесь.

Сон каизе ловов шапканзо пазава уголсо аштиця столенть лангс ды тоцк озась столенть экшс.

     Паряк, теня... мезеяк совавтан? — кичкерьгадсь икелензэ авась.

Вирьваныесь кевкстеманть прок эзизе маряяк. Маря ялатеке лиссь ды курок кандсь сулика вина. Те шкане совась Комаяк.

     Хвилипыч, м-мон лишметь кавто суманьсэ вельтия, тикшинеяк икелензэ каинь,  — сюконязь ладсо мерсь кудазорось ды потась столенть эйстэ ве ёнов, нинзэ ваксе.

Вирьваныесь эсь кедьсэ нуртясь стопка, цёрь симизе, теке веденть, ды велявтсь Кома ёнов.

Н-ну! Мезе, якить?! — пезнавтынзе уронь кондят сельмензэ кудазоронть коняс.

К-ко-ков якинь, Хвилипыч? — кокнозевсь Кома.

Тон тесэ монь икеле превтемекс иля теине! — вирьваныенть тусто сельмечирькензэ кармасть тей-тов якамо, теке кавто раужо каткат тюрезевсть. — Мои весемеде содан, иля сёпо!

Тесэ каштомикельде лиссь кавтошка иесэ тейтерьэйкакш, кундась Марянь платияс ды пельсавардезь кармась вешеме:

     Авай, макст чутя, иш, мамай, я!

Маря вадяштынзе эйкакшонть ашо черензэ ды, якстерьгадозь, варштась инженть лангс.

     Эзь тонадо  зярс  паро ладсо  кортамо.  Чурькантень мери чутя,   кшинтень    иш,   ведентень    мамай,   салонтень    я. Несак, кода эрятано. Истямонть печениядо-конфеткадо андомаль. Минек  кудосо  марч  марго  кшиськак  а  сатны...  Секс  якаськак Кома   Отяжелень  станцияв.   Паряк,   мерян,   куш   паця   потмине почткеть рами... Тон, Хвилипыч, копордак, копордак, минек лангс или вано. Копордак ды сускт...

Вирьваныесь кувать энялдомань учнеме эзь карма. Чиртизе суликанть, гыл-гыл симсь омбоце стопка, ды алонзо табуреткась чи-кордозевсь. Сон стясь, путызе шапканзо ды ёртсь кудазоронтень:

     Тон, Кома, вант, бути таго марян Отяжелев якамодот — тар-р-ркат муса-а-а!

Ур-р-рк! — таго мерсь кудонь кенкшесь. Ки-и-ир-рк! — тейсть кудыкельксэнь лазтнэ.

     Н-н-но-о-о! — марявсь ушосто.

Марянь ваксс мольсь омбоце тейтерьказояк. Кияксось кельме, эйкакштне — кепеть. Секс сынь, теке сенксьлевкст, ве пиль-генть нолдасызь, омбоценть кепедьсызь.

     Нюра,   Верыне,   тесэ  якшамо,   кузеде  седе  курок  каштлангс!  — серьгедсь тенет Маря.

Кома ильтизе инженть, совась ловташкадозь.

Кодаяк тень превс а сы, косто вирьваныесь марясь Отяже­лень станцияв якамодон? — мерсь сон нинстэнь. — Мииньгак ансяк кеменьшка чувтынеть. Ды кодат тосо чувтынеть — кедьсерькашка жердинеть...  Ушосто  кияк эзимим  нее,  конюхоськак малавикс ломань — ёвтнеме а карми...

Модантькак пилензэ улить, — стакасто лекстясь Маря. — Вирев апак кевксте иля яка.

Сестэ кода эно эрямс, кода эйкакштнень кастомс? — кепедизе прянзо Кома. — Колхозсо, ловт, овсе мезеяк а пандыть...У-у-ух, а вечкса Хвилянь Ванянь! Боярокс яки, симни, тандавтни. Ды  мезень  кис  сёвны?  Икеле  маласо  виренть лангсо  азорокс минек  велень  эрицятне   ульнесть.  А  ней    тарадкеяк  пельть
керямс!

Цю, цю-ю! — аволдась кедьсэнзэ авась. — Тон Ванянь пек иля  сёвно.   Сон  паро  ломанесь.   Оно,   шабра  вирень  ванстыесь кавто ломанть кемень иес озавтсь. Минекесь ансяк тандавтни. Таго мерян — паро-о-о ломанесь!

 

Категория: Мои статьи | Добавил: tati (20.03.2010)
Просмотров: 802 | Рейтинг: 0.0/0 |
Всего комментариев: 0
Имя *:
Email *:
Код *:
...ERZINFORM
ОД СЁРМАДКСТ
[31.10.2010][Стихи]
Александр Арапов. К... (0)
[24.01.2010][Мои статьи]
Художники в СССР. Из... (0)
[21.10.2010][Стихи]
Исланкин Юрий Иванов... (0)
[21.10.2010][Стихи]
Исланкин Юрий Иванов... (0)
[21.10.2010][Мои статьи]
Исланкин Юрий Иванов... (0)
ВЕШНЕК
ЛОПАНТЬ ЯЛГАНЗО
  • Официальный блог
  • Сообщество uCoz
  • FAQ по системе
  • Инструкции для uCoz

  • Copyright MyCorp © 2017
    Сделать бесплатный сайт с uCoz