Козонь чачить тон эрзянка?
Тон монень витьстэ ёвтык.
Эх! Эрзянка! Эрзянь ава!
Монь седеем калавтык.

Кода ютат тон икельган,
Монь превень чаракадыть.
Эх! Эрзянка! Эрзянь ава!
Тонь коряс арасть мазыйть.

Череть нолдазь кавтов ланга,
Сельмесэть менелень сэнь.
Эх! Эрзянка! Эрзянь ава!
Сехте вечкеват монень.

Кува якан, ков а молян,
Тон свал аштят монь мельсэнь.
Эх! Эрзянка! Эрзянь ава!
А стувтоват тон монень.

Козонь чачить тон эрзянка?
Тон монень витьстэ евтык.
Эх! Эрзянка! Эрзянь ава!
Монь седеем калавтык.

Вечкема!.. Кода тердинь сонзэ,
Зярдо тюсозо эль-эль палсь.
Друк сон вачкодинзе сёлмонзо
Ды видьстэ кедь куншказом валгсь.

Ды сеске весе талакадынь,
А вал а муян, а эсь пря.
Ды мик арсинь: бути ёматы,
Монень ули седе вадря.

***

Живой ведте мазый ёвтнеманть
Мон ансяк ёвкстнэстэ марсия.
Но вана се ведень лисеманть
Друк монсь эрямостон муия.

Эзь эряво масторт печтеме,
вешнемс сонзэ лия таркасто.
сонзэ муия эсь вечкемань
Пельспанжадо мазый турвасто

***

Тон кадовить монень мацей толгакс,
Ашо пельнекс ды жольниця леекс...
Соказь паксяс ожолдыця олгокс,
Сёксень вестэ сэредиця пеекс...

Тон кадовить седейс шожда мелекс,
Нусманячинь сехте домка тешксэкс...
Тон васолат. Тон сельмень икелят.
Эрямосом цивтёрдат, прок теште.

***

Кие соды, зяро ютыть чить?
Кие соды, зяро печтить пингеть?
Ютазь ким вельксэс тикшине сти.
Ансяк а комави сон монь пильгтнес.

Тия ютыть ломантне лият -
Сыця шкас бажамотнесэ кандозь.
Седейзэст пиземечирькекс прат
Тон, вечкемам, сэнь менеленть алдо!

***

Венстить укшторонь лопа -
Ожо-ожо, прок медесь,
Ды мерить апак сёпо:
"Ярмактоман зярс!. Сэдесь
Пильгень ало нурсезевсь,
Кирвазсь седейсэнь теште.
Ковось менельстэ сезевсь
Ды валдомтызе мештенть.
Те укшторонь лопадонть
Ней ледстнян сельмень конязь.
Аштинь икелеть стядо -
оймем пильгс теть сюконясь.

***

Пазось макссь эрямо - эряк.
Вант, лязо уле верек
Эрязь иетнестэ кшись.
Капшат? Шкась теть а сасави,
Ялатеке оймамс сави.
Те ансяк истя маряви -
Кувука Пазонтень кись...